Kush është CEO më i ri në Gjermani?
Marc Fielmann, i cili do të marrë përsipër i vetëm rolin e kryetarit ekzekutiv të kompanisë gjermane të syzeve të krijuar nga babai tij, po u premton investitorëve një rritje më të shpejtë si dhe një zgjerim më të madh në treg.
Edhe pse vetëm 29 vjeç, fakt që mund të çojë në skepticitet dhe vështirësi besueshmërie, Fielmann i ri ka arritur të paraqesë me bindje projektet e tija për ndryshime në kompani, duke u cilësuar si CEO më i ri në mesin e kompanive më të mëdha gjermane të kuotuara në bursë.
Kompania e Fielmannit, e cila radhitet e treta në listën e bizneseve të kuotuara në bursë për Europën kontinentale, parashikon të rritet në 25% deri në vitin 2025 nga rreth 17% që ka tani, njofton zëdhënësi i saj në Hamburg.
Kompania planifikon të shesë 12 milionë palë syze deri në vitin 2025, krahasuar me 8.15 milionë në vitin 2018. Të ardhurat e jashtme, që përfshijnë tatimin mbi vlerën e shtuar dhe ndryshimet e inventarit, do të rriten në rreth 2.3 miliardë euro deri në 2025 nga 1.65 miliardë euro të vitit të kaluar, bën me dije kompania.
Një nga mënyrat me të cilat kompania, nën drejtimin e Fielmannit të ri, synon të realizojë rritjen është pikërisht shitja online e syzeve, një veprim që babai i tij e kish shmangur prej vitesh. Veç kësaj ai planifikon shpenzime prej rreth 200 milionë euro për vitin 2019-2020, rreth dyfishin e asaj që ishte investuar deri më sot, për të hapur dyqane të reja si dhe zhvilluar më shumë anën digjitale të biznesit.
Burimi: Bloomberg
Përshtati: Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.