Kush është Fatjona Memcaj, prokurorja e parë ndërlidhëse për Shqipërinë që fillon në Eurojust
Fatjona Memcaj ka nisur punën si Prokurorja e parë Ndërlidhëse (PN) për Shqipërinë në Eurojust. Referuar njoftimit zyrtar të EUROJUST, roli i saj i ri në Agjencinë e Bashkëpunimit për Drejtësinë Penale të Bashkimit Evropian është rezultati i drejtpërdrejtë i Marrëveshjes së Bashkëpunimit midis Eurojust-it dhe Shqipërisë, e cila hyri në fuqi në nëntor 2019. Shqipëria është vendi i 10-të joanëtar i BE-së që ka një PN në Eurojust.
“Zonja Memcaj do të punojë krah për krah me kolegët nga Shtetet Anëtare të BE-së në hetimet ndërkufitare që përfshijnë Shqipërinë. Znj. Memcaj ka përvojë të gjerë në ndjekjen penale të krimit financiar dhe korrupsionit, si dhe ka qenë përgjegjëse për bashkëpunimin gjyqësor ndërkombëtar në Shqipëri” evidentohet në njoftim.
Para se të fillonte në Eurojust, nga viti 2013 deri në fund të vitit 2020, znj. Memcaj ka qenë Prokurore e Gjykatës së Apelit në zyrën e prokurorisë të Gjykatës së Apelit Tiranë.
Në këtë cilësi, ajo ishte përgjegjëse për rastet që kërkonin ndihmë të ndërsjellë ligjore, në veçanti kërkesat për ekstradim. Ajo e ndërthuri këtë funksion me rolin e pedagoges në universitete të ndryshme shqiptare dhe në Shkollën Kombëtare të Magjistraturës.
Prokurorja e re për Shqipërinë u diplomua në Shkollën e Magjistraturës në vitin 2002 dhe u bë prokurore në Prokurorinë e Rrethit Tiranë. Në vitin 2006, ajo iu bashkua Njësisë së tyre të Posaçme të Hetimit, si një nga prokuroret e para që merrej me vepra penale financiare dhe me korrupsionin.
Në vitin 2008, ajo u bë shefe e Njësisë Ligjore në zyrën e Presidentit shqiptar, para se t’i bashkohej Gjykatës së Apelit në vitin 2013. Znj. Memcaj ka një doktoraturë në drejtësi nga Universiteti Middlesex në Londër.
“Bashkëpunimi gjyqësor ndërkufitar midis Shqipërisë dhe Eurojust-it është rritur shumë në pesë vitet e fundit, me mbi 40 për qind. Midis vitit 2016 dhe 2020, në Eurojust u regjistrua një total prej 84 çështjesh të hetimit penal me përfshirje shqiptare. Shqipëria tashmë ka marrë pjesë në shtatë ekipe të përbashkëta hetimore (JIT), mbështetur nga Eurojust.
Eurojust ka përfunduar marrëveshje me 12 vende të treta: katër në Ballkanin Perëndimor (Shqipëria, Mali i Zi, Maqedonia e Veriut dhe Serbia), si dhe me Gjeorgjinë, Islandën, Lihtenshtajnin, Moldavinë, Norvegjinë, Zvicrën, Ukrainën dhe SHBA-në. Në total, dhjetë vende të treta kanë tani Prokuror Ndërlidhës në Eurojust” vijon njoftimi.
Eurojust, Agjencia e Bashkëpunimit për Drejtësinë Penale e Bashkimit Evropian, është e vendosur në Hagë, Holandë, ku autoritetet gjyqësore kombëtare punojnë ngushtësisht së bashku për të luftuar krimin e rëndë ndërkufitar të organizuar.
Roli i Eurojust-it është të ndihmojë që Evropa të bëhet një vend më i sigurt, duke koordinuar punën e autoriteteve kombëtare – nga Shtetet Anëtare të BE-së si dhe nga shtetet joanëtare të BE-së – për hetimin dhe ndjekjen penale të krimit ndërkufitar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.