Kush është Fiona McCluney, koordinatorja e re e OKB-së për Shqipërinë! Karriera në Palestinë, Irak e Mal të Zi
Kryetari i Kuvendit, Gramoz Ruçi, priti Koordinatoren e re të Përhershme të OKB-së në Shqipëri, Znj. Fiona McCluney, me rastin e fillimit të detyrës së saj në Tiranë.
Referuar njoftimit zyrtar, Koordinatorja e re e Përhershme e OKB-së në Shqipëri, Znj. Fiona McCluney, falenderoi Kryetarin e Kuvendit, z. Gramoz Ruçi, për angazhimin institucional dhe personal si edhe rolin e tij konstruktiv në hartimin e legjislacionit shqiptar si edhe bashkëpunimin me organizatat e sistemit të OKB-së.
Ajo shprehu vlerësimin që reforma zgjedhore, përveç çështjeve të tjera, ka arritur të garantojë edhe barazinë gjinore në përfaqësimin në Kuvendin e Shqipërisë dhe vuri në dukje punën e lavdërueshme të Kuvendit dhe të Kryetarit Ruçi për ratifikimin e konventave ndërkombëtare dhe hartimin e legjislacionit në mbështetje të të drejtave të njeriut, fëmijëve, refugjatëve dhe azilkërkuesve.
Me 4 shtator, sekretari i Përgjithshëm i OKB-së caktoi Fiona McCluney nga Mbretëria e Bashkuar si koordinatore të OKB-së për Shqipërinë.
McCluney ka 30 vite eksperiencë në planifikimin urban, duke përfshirë dhe 12 vite shërbim në Kombet e Bashkuara. Më herët, ajo ka qenë koordinatore rezidente e OKB-së në Mal të Zi (2015-2018). Para kësaj detyre, ajo ka qenë kryer detyra për OKB-në në Palestinë dhe Irak. Para se t’u bashkohej Kombeve të Bashkuara, McCluney ka punuar në sektorin privat dhe në departamentin e zhvillimit ndërkombëtar në Mbretërinë e Bashkuar, ku ka qenë e përfshirë në iniciativa të ndryshme të politikave publike në Azi.
Ajo mban një master në filozofi nga Universiteti i Edinburgh në Mbretërinë e Bashkuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.