Kush janë shtrigat rumune që po luftojnë korrupsionin?

Ndërsa Rumania po përgatitet për zgjedhjet europiane, një grup i vetshpallur magjistricash po punon me dyer të mbyllura për të siguruar që vetëm kandidatët e ‘duhur’ të fitojnë vende në parlamentin e ri.

Njëra prej tyre, Mihaela Minca, thotë se po punon për një ritual masiv përpara votës së 25 majit për të ndriçuar mendjet e kandidatëve në mënyrë që ata të marrin vendimet më të mira për popullin rumun, bën të ditur Euronews.

“Ne jemi duke përgatitur një substancë shumë të fuqishme për 25 maj, të cilën vajzat e mia do ta hedhin mbi ndërtesën e qeverisë rumune”, tha ajo.  Shtrigat kanë kryer ritualet në mesnatë, agim dhe muzg që nga 9 maji për të krijuar substancën magjike. Ato thonë se shpikja përmban gjurmë të kafshëve, qirinjve dhe luleve.
Edhe pse Minca zakonisht ofron shërbimet e saja për çështje dashurie apo të parave, kësaj here ajo është fokusuar të ndihmojë vendin e saj. Ajo u bashkua me një rrjet magjistricash rumune që kërkonin të mallkonin ligjvënësit rumun të cilët mund të ishin të korruptuar sipas tyre.

“Ne zbuluam dy rituale të veçanta për politikanët rumunë: Një ritual magjik i bardhë për të ndriçuar mendjet dhe fuqitë e tyre për të luftuar në Rumani për njerëzit, për të bërë gjëra të mira. Si dhe magjinë e zezë për ata që nuk ofrojnë një jetë më të mirë për rumunët.

Magjia është një zakon i vjetër popullor në vendin e Evropës Lindore. Në vitin 2015, qeveria e Rumanisë e bëri magjinë një profesion të tatueshëm, duke i detyruar lexuesit e pasurisë, lexuesit e letrave dhe shtrigat, që të paraqesin taksat për punën e tyre. Ato gjithashtu duhet të kenë një leje për të praktikuar zakonet e tyre të lashta.

Shtrigat edhe në versionin online

Minca dhe vajzat e saj kanë përdorur fuqitë ‘magjike’ të internetit për të ofruar shërbimet e tyre për klientët në mbarë botën. Praktika mbetet e njëjtë, tha ajo, por na lejon të jemi në kontakt edhe me klientë të vendeve të tjera.

“Njerëzit që kanë nevojë për ndihmën tonë duhet të na dërgojnë fotot dhe emrat e tyre dhe për shkak se janë në një distancë kaq të madhe, mjafton vetëm t’i shohim ata në Facebook dhe më pas të vazhdojmë me magjinë e ritualit”.

Burimi: Euronews

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.