Kush konsiderohet “kryefamiljar” për qëllime tatimore?

Kryefamiljari, për qëllime tatimore, konsiderohet një person i cili punëson individë si punëtorë shtëpie.

Konsiderohen “punëtorë shtëpie” personat që punësohen nga kryefamiljari, në punë të tilla si:

-kujdestar për fëmijët,

-kuzhinier,

-pastrues,

-roje-administrator shtëpie,

-asistent për të moshuarit, etj.,

apo edhe shërbime të ndryshme të kësaj natyre;

Kryefamiljari është i detyruar që të regjistrohet pranë Drejtorisë Rajonale Tatimore, në juridiksionin e së cilës ndodhet vendbanimi.

Dokumentacioni për regjistrim

Kryefamiljari, që punëson persona si punëtorë shtëpie, paraqet për regjistrim:

Kërkesë me shkrim;

Fotokopje të Kartës së Identitetit ose të Pasaportës të kryefamiljarit;

Kopje të marrëveshjes së punës së nënshkruar midis tij dhe të punësuarit, e cila përveç të tjerave duhet të përmbajë detyrimisht :

numrin e sigurimit shoqëror të personit të punësuar,

kohën e fillimit të punës,

kohëzgjatjen e saj “me ose pa afat”,

pagën mujore bruto.

Çregjistrimi

Çregjistrimi bëhet me kërkesë të tij, pranë Drejtorisë Rajonale Tatimore, ku është bërë regjistrimi, me kërkesë të kryefamiljarit.

Detyrimet që duhen paguar

Personat e punësuar, që punojnë me kohë të plotë apo të pjesshme pune, si punëtorë shtëpie në familjet e të tjerëve, sigurohen në mënyrë të detyrueshme për:

degën e pensioneve dhe

për sigurimin e kujdesit shëndetësor.

Për personat që punojnë si punëtorë shtëpie, kryefamiljari duhet të deklarojë dhe të paguajë kontribut minimal mujor në shumën 3 498 lekë, nga të cilat:

2 750 lekë për sigurime shoqërore;

748 lekë për sigurimin e kujdesit shëndetësor.

Pagesa e kontributeve bëhet çdo tremujor, brenda datës 20, të muajit të parë pas përfundimit të çdo tremujori të vitit kalendarik, konkretisht sipas kalendarit:

20 Prill

20 Korrik

20 Tetor

20 Janar

Kontributet e sigurimeve shoqërore dhe të sigurimit të kujdesit shëndetësor, paguhen nga kryefamiljari, në bankat e nivelit të dytë.

Burimi: Faqja zyrtare e Tatimeve

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.