Kush mund të shesë në karantinë? Supermarketet franceze, të njëjtat limite në mallra si dyqanet e vogla

Supermarketet franceze do të përballen me të njëjtat limite të shitjes së mallrave jo të nevojshme si dyqanet e vogla, por pronarët e dyqaneve nuk janë të lejuar të sfidojnë rregullat e karantinës së qeverisë, sipas ministrit të financave, Bruno Le Maire. Pronarët e dyqaneve të vegjël janë ankuar mbi mbylljen e detyruar, ndërkohë që supermarketet lejohen të shesin mallra jo të nevojshme si këpucë, veshje, produkte të kozmetikës dhe lule, për shkak se ato shesin edhe ushqime. Kryeministri Jean Castex tha në fundjavë se supermarketet do të duhet të ndalojnë shitjet e mallrave jo të nevojshme. Pronarët e dyqaneve të vogla, që kanë rritur magazinimet përpara Krishtlindjeve,  kërkojnë të hapen dhe kryebashkiakë në disa qytete në Francë i kanë mbështetur. Megjithatë, ministri i Financave, Bruno Le Maire, tha se ndërhyrja tek rregullat shtetërore është e papërgjegjshme.

“Mendoj që thyerja e rregullave të qeverisë duke ndërmarrë dekrete bashkiake, është e papërgjegjshme. Ne nuk do të listojmë të gjithë produktet, por produktet që mund të shiten në supermarket, mund të shiten edhe në dyqane të vogla. Një dyqan që shet pajisje kompjuteri mund të qëndrojë i hapur, për shkak se ndihmon punën nga shtëpia, dhe e njejta gjë do të ndodhë edhe për supermarketet.”  

Ministri tha se pasi infeksionet të ngadalësohen, qeveria mund të zbusë rregullat e karantinës dhe të lejojë disa dyqane të hapen me kushte të caktuara, si nëpërmjet lënies së orareve.  Vendimi mbi këtë mund të merret nga data 12 Nëntor. Ndërkohë, supermarketet do të përballen me të njëjtat limite mbi produktet jo të nevojshme si dyqanet e vogla dhe nuk do të mund të shesin mallra si këpucë, veshje apo lule.  Le Maire tha se turmat në supermarkete janë të papranueshme dhe duhen respektuar rregullat  e 1 personi në 4 metër katrorë, apo 250 në një supermarket prej 1,000 metra katrorë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.