Kushtetuesja me 7 anëtarë brenda 31 dhjetorit? – Komisioni i Ligjeve miraton pa garë Altin Binajn, Manja: “Topi” në fushën e Presidentit

Komisioni Parlamentar i Ligjeve ka miratuar kandidaturën e Prokurorit Altin Binaj si anëtar i Gjykatës Kushtetuese, duke hapur mundësinë që ajo të jetë funksionale përpara 31 dhjetorit, kërkese e ardhur nga faktori ndërkombëtar. Megjithëse kandidaturë e vetme, ndërkohë që nevojiten 3, Komisioni i Ligjeve arsyetoi se emergjenca në të cilën ndodhet kjo gjykatë, bashkë me këshillën e Komisionit të Venecias, por edhe kushti që ka vënë BE për çeljen e negociatave, e bën të pranueshme pranimin e tij si kandidaturë e vetme.

Binaj bëri përpara Komisionit një përmbledhje të karrierës së tij profesionale, ndërkohë që si vision të punës nënvizoi nevojën për shkarkimin e dosjeve të akumuluara në Gjykatën Kushtetuese, transparencën e kthimit të besimit të publikut te ky organ

Në fund Kreu i Komisionit të Ligjeve theksoi se tashmë i takon Presidentit të Republikës të miratojë dy anëtarët e tjerë, në mënyrë që Kushtetuesja të ketë 7 anëtarë brenda 31 dhjetorit duke u bërë kështu funksionale.

Në rast se do të votohet nga Kuvendi, Altin Binaj do të jetë Gjyqtar i Kushtetueses deri në prill të vitit 2022, duke qenë se mandati i tij është plotësues dhe është shpallur katër herë duke nisur nga viti 2018.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.