Kuvendi, interpelancë për Teatrin – Rudina Hajdari: E shembe se të duhej trualli, 3 shkelje ligjore. Rama përgjigjet me fjalët e artistëve

Si një prej firmëtareve kryesore të interpelances për shembjen e Teatrit Kombëtar, Rudina Hajdari ka akuzuar Kryeministrin Edi Rama se ajo godinë u shemb vetëm sepse trualli I saj nevojitet për ndërtimin e kullave, dhe se kjo nuk do të ndodhte nëse vendndodhja e tij do të ishte diku tjetër. Ajo tha gjithashtu se Rama ka kryer tre shkelje ligjore me vendimin për shkatërrimin e tij: së pari sepse me një VKM të vitit 2,000 Teatri përfshihej në një sipërfaqe të njohur zyrtarisht si zonë historike; së dyti, se në vitin 2017 është përgjysmuar sipërfaqja e kësaj zone historike; dhe së treti pasi Bashkisë Tiranë nuk I është kaluar në pronësi trualli I Teatrit Kombëtar, por I Teatrit Eksperimental, me sipërfaqe shumë më të vogël.

Kryemistri Edi Rama zgjodhi të mos përgjigjej drejtpërdrejt për interpelancen, duke thënë se i ka mbaruar argumentet mbi këtë temë, por përcolli nga foltorja e Kuvendit qëndrimet e rreth 20 artistëve mbi godinën, mes të cilëve Robert Ndrenika, Kadri Roshi, Raimonda Bulku, apo Ismail Kadare.

Interpelanca për shembjen e Teatrit Kombëtar u kërkua nga disa deputetë të opozitës, me nismëtarë kryesorë Rudina Hajdarin e Ralf Gjonin.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.