Kuvendi, “ujë të ftohtë” ERE-s – Shumë detyrime të rezolutës nuk janë përmbushur

Shumë detyrime të lëna nga Kuvendi në Rezolutën e vitit 2018 për Entin Rregullator të Energjisë nuk janë përmbushur.

Teksa shqyrtonin raportin vjetor të këtij institucioni, në Komisionin parlamentar të Veprimtarive Prodhuese u theksua fakti se ERE duhej të kishte bërë përpjekje konkrete në drejtim të ndarjes së Operatorit të Shpërndarjes së Energjisë Elektrike, pronësisë së kabinave elektrike, ku mbi 51% e tyre janë në pronësi të privatit apo stimulimit të zbatimit të sistemit të ri  të faturimit nga ana e OSHEE-së, që parashikon leximin e matësit çdo 3 muaj.

Ndërkaq, në prezantimin e tij, kreu I Entit Rregullator të Energjisë, Petrit Ahmeti tha se viti që lamë pas ka qenë një vit i mirë për kompanitë, duke theksuar faktin se ulja e humbjeve në rrjetin e shpërndarjes arriti në 23.96%. Megjithatë, sipas tij varësia nga burimet hidrike tregon se mbetet shumë për të bërë në drejtim të diversifikimit të burimeve gjeneruese.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.