Ky frigorifer 50 mijë dollarësh nga D&G kërkon të jetë vepra e artit e radhës në shtëpinë tuaj
Kur blini elektroshtëpiake si frigoriferë apo lavatriçe, zakonisht ajo që ka rëndësi është çfarë ka brenda produktit. Por për Frigorifero d’Arte të kompanisë “Smeg”, rëndësi ka pamja e jashtme.
Kompania italiane 70-vjeçare e elektroshtëpiakeve ka bashkëpunuar me shtëpinë e modës Dolce & Gabbana për të krijuar një seri frigoriferësh me vlerë 50 mijë dollarë. Produktet janë të pikturuara me dorë me motive popullore të frymëzuara nga ngjyrat e vendlindjes së Domenico Dolce, Siçilisë.
Forma e frigoriferit merr shembull nga e kaluara, me një dorezë të vetme, një lartësi prej 150 centrimetrash dhe një kornizë të rrumbullakët si të viteve ’50.
Duket sikur jemi duke zgjedhur për një vepër arti në vend të një elektroshtëpiakeje. Ky dizajn nga artisti Michelangelo Lacagnina është frymëzuar nga tarantela, kërcimi tradicional italian. Mund të mos jetë i përshtatshëm për përdorimin e përditshëm në familje, pasi pjesa e ngrirjes mund të ketë nevojë herë pas here për shkrirje, megjithatë çmimi është i caktuar në 50 mijë dollarë.
Edhe pse nuk ka shumë rivalë në linjën e frigoriferëve dhjetëramijëra dollarësh, Frigorifero d’Arte do të konkurrojë me Dacor Atelier, e cila ka prodhuar një frigorifer 40 mijë dollarësh. Ky i fundit në brendësi është prej porcelani, ndërsa nga jashtë është përdorur fibra aramide, e cila përdoret në jelekët antiplumb.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.