Lagarde jep dorëheqjen nga FMN – Pritet të emërohet si presidente e Bankës Qendrore Europiane

Christine Lagarde ka prezantuar dorëheqjen zyrtare si shefe e Fondit Monetar Ndërkombëtar, ndërsa mandati i saj 5-vjeçar përfundon më 12 shtator.

Pas njoftimit  të Lagarde, Bordi Ekzekutiv i FMN-së, deklaroi se do të fillojë menjëherë procesin e përzgjedhjes së drejtorit të ardhshëm manaxhues të institucionit. Dorëheqja e Lagarde vjen pas nominimit të saj si presidente e Bankës Qendrore Europiane, më herët gjatë këtij muaji, si pjesë e marrëveshjes së liderëve europianë mbi drejtuesit e ardhshëm të institucioneve të unionit.

Më pas, Lagarde vendosi të tërhiqet përkohësisht nga FMN, gjatë periudhës së nominimit. Lagarde, një shtetase franceze 63-vjeçare, do të bëhej gruaja e para që drejton Bankën Qendrore Europiane dhe do të zëvendësojë në këtë mënyrë, Mario Draghin, mandati 8-vjeçar i të cilit përfundon më 31 tetor. Në 5 korrik të vitit 2011, Lagarde u bë drejtuesja e 11 e Fondit Monetar Ndërkombëtar dhe ishte gruaja e parë që drejtonte këtë institucion.

Më pas, ajo u rizgjodh për një mandat të dytë 5-vjeçar në krye të FMN-së, që filloi në korrik të 2016-ës. Përpara kësaj detyre, Lagarde ka shërbyer edhe si ministre e financave në Francë,  në periudhën 2007-2011.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.