Lagarde pritet me protesta në Argjentinë – Kreu i FMN takime në kuadër të G20

Argjentinasit e kanë pritur me protesta numrin një të Fondit Monetar Ndërkombëtar, Christine Lagarde, e cila ndodhet në Buenos Aires për punimet e takimit të G20-ës.

Një muaj më parë, qeveria e Argjentinës dhe Fondi Monetar Ndërkombëtar njoftuan arritjen e një marrëveshje 3-vjeçare për një vlerë prej 50 miliardë dollarësh hua. Pjesë e kësaj marrëveshje përfshihen edhe angazhimet e qeverisë për të përshpejtuar planet e uljes së defiçiti fiskal, çka përkthehet në ulje të shpenzimeve dhe shtrëngim për qytetarët.

Këto masa vijnë paçka se, rritja ekonomike projektohet e ulët dhe inflacioni i lartë në vitet në vijim.

Rikthimi i raporteve me FMN ka shkaktuar shumë pakënaqësi në vend, sidomos pas eksperiencës së keqe që ka kaluar vendi me institucionin huadhënës pas krizës së viteve 2002-2002.

Në Buenos Aires ndërkohë, Lagarde është takuar edhe me kreun e Bankës Qendrore të vendit. Nga ana tjetër, Presidenti i vendit, Maurizio Macri ka kryer takime me anëtarë të Bankës Amerikane për Zhvillim të cilët janë në Kryeqytetin e vendit për takimet në kuadër të G20-ës.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.