Lagjet e Tiranës sipas dendësisë – Distancimi social më i vështirë te “M.Shyri” e “Tiranë të Re”, më i lehtë te “tregu elektrik”

Publikimi i Eurostat i disa ditëve më parë tregonte se, krahasuar me mesataren europiane, dendësia e popullsisë në Shqipëri është më e ulët, ç`ka favorizon edhe distancimin social. Por, brenda vetë Shqipërisë, tregonte eurostat, diferencat janë të ndjeshme, me qendrën, 3-4 herë më të dendur në popullsi sesa jugu apo veriu i vendit. Tirana si qark ndërkohë ka një dendësi popullsie mbi 5 herë më të lartë se mesatarja e vendit. Por, të dhënat e Bashkisë Tiranë tregojnë se brenda njësive administrative të kryeqytetit, ku përfshihen ish njësi bashkiake dhe ish komuna, diferencat janë mjaft të mëdha.

Po cilat janë lagjet më të dendura dhe ato më pak të dendura të Tiranës? Me një diferencë mjaft të ndjeshme me pjesën tjetër të kryeqytetit, njësia numër 10 mban rekordin si lagja me dendësinë më të madhe të popullsisë, jo vetëm në Tiranë por me gjasa në të gjithë Shqipërinë. Këtu, dendësia e popullsisë sinjalizon rreth 36 mijë banorë për 1 km2 , ndërkohë që mesatarja e Shqipërisë fiksohet në vetëm 99.6, dhe ajo e Tiranës si Bashki në 758, pra, rreth 50 herë më e lartë. Njësia e dytë administrative me më shumë banorë për km2, me rreth 30 mijë, figuron njësia nr.5, që në masë i referohet Tiranës së Re, kryesisht zonës së ish bllokut dhe asaj përreth stadiumit “Selman Stermasi” dhe liqenit të Tiranës.

Në këtë njësi administrative, numërohen rreth 30 mijë banorë për km2. Më pas ndjek njësia nr.7, zona prapa policisë bashkiake te kryqëzimi i “21 Dhjetorit”. Ndërsa zona me dendësinë më të vogël figuron njësia nr.2, pra zona e tregut elektrik dhe qytetit studenti, me rreth 8600 banorë për km2. Sa i përket ish komunave, tashmë njësi administrative, Kashari, që përfshin edhe zonën e “Astirit”, është zona me dendësinë më të lartë me rreth 1200 banorë për km2, ndërsa Shëngjergji ajo me dendësinë më të ulët, me vetëm 12 banorë për km2.  Distancimi social është kthyer në kryefjalën e këtyre ditëve dhe me shumë gjasa do të mbetet mend gjatë në memorjen tonë kolektive.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.