Lajm i mirë për vaksinat e Covid tek gratë shtatzëna

Gratë shtatzëna dhe në gji dhënie zhvillojnë një përgjigje të fuqishme imune pas vaksinës anti-covid, dhe kalojnë antitrupa në fetus.

Vaksinat Covid nxisin një përgjigje të rëndësishme imune tek gratë shtatzëna dhe ato në gji duke promovuar prodhimin e antitrupave që transmetohen në fetus përmes placentës, ose tek i porsalinduri me qumësht gjiri.

Kjo është ajo që del nga studimi më i madh mbi këtë temë i botuar në Gazetën Amerikane të Obstetrikës dhe Gjinekologjisë (AJOG) dhe kryer mbi 131 gra në moshë riprodhuese: shifra edne të vogla, sigurisht, por prapë janë hapi i parë, duke marrë parasysh që nënat e ardhshme nuk ishin përfshirë (ose ishin të përfshira në përqindje të papërfillshme) në provat eksperimentale të vaksinave të mundshme anti-Covid.

Studimi i koordinuar nga Spitali i Përgjithshëm i Masaçusetsit u përqendrua në vaksinat anti-covid Pfizer / BioNTech dhe Moderna mRNA, të administruara në 84 gra shtatzëna, 31 në gji dhe 16 jo shtatzënë. Sasia e antitrupave të prodhuar ishte e njëjtë në të gjitha grupet, shumë më e lartë se ajo që rezulton nga një infeksion natyror; reagimet e rralla anësore ishin të krahasueshme në tre mostrat – domethënë, shtatzënia nuk përfaqësonte një gjendje rreziku për efektet anësore të vaksinës.

Nga ana tjetër, gratë shtatzëna janë më të rrezikuara nga kontraktimi i Covid të rëndë, që kanë nevojë për shtrim në spital ose ajrim të asistuar (megjithëse shumica e pacientëve shtatzënë shërohen pa ndërlikime). Infeksioni SARS-CoV-2 gjatë shtatzënisë shoqërohet gjithashtu me një rrezik në rritje të lindjes së parakohshme. Për të gjitha këto arsye – për të cilat kemi shkruar më gjerësisht këtu – kjo kategori njerëzish do të kishte të drejtën e përparësisë së vaksinimit, po të mos ishte për faktin se u vendos që të mos përfshihen gratë shtatzëna në raundin e parë të studimeve të kontrolluara eksperimentale mbi vaksinat . Një zgjedhje që ne tani e paguajmë në pasiguri.

Efekti mbrojtës shtrihet edhe tek fëmija: antitrupat e prodhuar falë vaksinave u gjetën në të vërtetë në të gjitha mostrat e gjakut të kordonit të kërthizës dhe qumështit të gjirit të analizuara në studim, dëshmi e një transmetimi vertikal të mbrojtjes anti-covid. Disa ditë më parë doli lajmi i vajzës së parë që erdhi në botë me antitrupa kundër SARS-CoV-2 nga vaksinimi: ajo i kishte marrë ato nga nëna e saj, një punëtore shëndeti publik në Florida e imunizuar me dozën e parë të vaksinës Moderna në Javën e 36-të të shtatzënisë.

“Shpresojmë që ky studim të bëjë që zhvilluesit e vaksinave të njohin rëndësinë e studimit të grave shtatzëna dhe në gji dhe t’i përfshijnë ato në prova”, thonë autorët. “Duhet të kuptohet që shtatzënia është një gjendje e veçantë imunologjike, në të cilën dy jetë mund të shpëtohen njëkohësisht me një vaksinë të fuqishme.” Ideja është që të shtrihet ky lloj studimi edhe në vaksinat e tjera anti-covid, posa të bëhen të disponueshme në SHBA. (Focus)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.