Ndjenja  e besimit të investitorëve në Eurozonë ra për të 5-in muaj me radhë në Gusht, duke prekur nivelin më të ulët në 3 vitet e fundit. Sipas të dhënave të grupit të studimit të tregut, Sentix, shqetësimi kryesor lidhet me krizën e borxheve në bllokun me 17 anëtarë. Sentix tha se indeksi i besimit të investitorëve ra në -30.3 pikë në gusht nga -29.6 që ishte që Korrik. Por kjo shifër është më lart parashikimit të analistëve për rënie në -31 pikë.

Komentet e Presidentit të Bankës Qendore Europiane, Mario Draghi, që sinjalizuan se Banka e Europës mund të rifillojë të blejë bonot e Italisë dhe Spanjës për të ulur koston e huamarrjes, kanë ndihmuar kufizimin e rënies së mëtejshme të këtij indeksi. Ndërsa komponenti për pritshmëritë shënoi një rritje të lehtë, për herë të parë në shumë muaj, duke u rritur në -23.3 nga -24 pikë që ishte në Korrik. “Arsyeja kryesore për këtë përmirësim të lehtë, me shumë mundësi ishte mbrojtja jashtëzakonisht energjike, që Mario Draghi i bëri euros”, tha Sentix në raporin e tij.

“Rezultatet e studimit treguan se kjo deklaratë i siguroi investitorët, sidomos ata institucionalë, se hapa të tjerë vendimtarë do të ndërmerren për të mbrojtur monedhën e përbashkët”. Megjithatë, sub-indeksi për situatën aktuale vazhdoi rënien në Gusht, në -37 pikë nga -35 që ishte muajin paraardhës, që njëkohësisht është niveli më i ulët që nga Korriku i 2009. Ndërsa, indeksi i veçantë për Gjermaninë ra në 1.3 pikë nga 2.2, pavarësisht një përmirësimi të lehtë të komponentëve për të ardhmen. Edhe indeksi për Shtetet e Bashkuara shënoi rënie, ndërsa në Azi, me përjashtim të Japonisë, indeksi i besimit të investitorëve rregjistroi rritje.

Përgatiti: Lidion Kulla

Postoje këtë artikull në: