Ekonomia italiane u kontraktua me 0.7% në tremujorin e dytë të këtij viti. Këto të dhëna kanë komplikuar situatën e qeverisë teknokrate të Mario Montit, që përballet me krizën e borxheve, e cila kërcënon të gjithë bllokun e monedhës së përbashkët. Rënia e Prodhimit të Brendshëm Bruto me 0.7% është rënia e katërt me radhë për një ekonomi të zhytur në recesion që nga mesi i vitit të kaluar. Të dhënat ishin pak më dobëta se parashikimet e analistëve, që prisnin një rënie me 0.6%.

Raporti zyrtar i institutit italian të statistikave, tregoi se Prodhimi i Brendshëm Bruto ra me 2.5% në nivel vjetor, pas rënies me 1.4% në tremujorin e parë. Italia ka qënë ekonomia më e ngadaltë e Eurozonës për më shumë se një dekadë, duke nxitur shqetësimet e investitorëve në lidhje me aftësinë e qeverisë për të vënë nën kontroll borxhin publik që është sa 123% e prodhimit të brendshëm. Recesioni dobëson të ardhurat nga taksat dhe njëkohësisht godet punësimin dhe konsumin, duke krijuar një rreth vicioz, që e bën më të vështirë realizimin e objektivave nga qeveria Monti.

Confindustria në Itali parashikon se ekonomia do të kontraktohet me 2.4% gjatë këtij viti, dyfish më i lartë se parashikimi i qeverisë për rënie me 1.2%. Monti miratoi masat e reja të kursimeve prej 20 miliardë euro deri në fund të vitit, por paketa, e përbërë kryesisht nga rritja e taksave, ka goditur moralin konsumator dhe ka thelluar recesionin. Sipas përllogaritjeve, gjatë këtij viti, shpenzimet konsumatore pritet të rregjistrojnë rënien më të madhe të historinë e Italisë, që pas Luftës së Dytë Botërore.

Përgatiti: Lidion Kulla

Postoje këtë artikull në: