Kjo javë pritet të jetë e një rëndësie të veçantë për Eurozonën. Gjatë këtyre ditëve po zhvillohen, dhe deri në fund të javës do të zhvillohen takime të rëndësishme politiko-ekomomike ku në qendër të bisedimeve është ulja e kostos së hua-marrjes, roli i BQE për blerjen e këtyre bonove dhe sigurimi i një rritje të qendrueshme ekonomike.

Të hënën në mbrëmje sekretari amerikan i Thesarit, Timothy Geithner, është takuar me ministrin gjerman të Financave, Wolfang Schaeuble, ku shprehu besimin në aftësinë e vendeve anëtare të Eurozonës për të zbatuar reformat, si dhe për të arritur në një integrim më të madh europian. Gjithashtu sekretari amerikan i thesarit është takuar për disa orë edhe me guvernatorin e BQE, Mario Draghi në Frankfurt, por pas këtij takimi nuk është bërë asnjë koment.

Njëkohësish edhe kryeministri Italian, Mario Monti, do të vijojë gjatë këtyre ditëve një tur europian nga Franca, Finlanda e më pas në Madrid për të bindur qeveritarët për rëndësinë që ka në këto momente ndërhyrja e BQE në tregun dytësor të bonove sovrane. Gjithsesi do të jetë e Enjtja dita e së vërtetës ku do të verifikohen edhe fjalët e presidentit të BQE, Mario Draghi, i cili tha javën e kaluar se institucioni që ai drejton do të bëjë gjithçka për të mbrojtur eurozonën dhe për të luftuar rritjen, sipas tij të pajustifikuar të kostos së hua-marrjes nga vendet anëtare.

Përgatiti: Lidion Kulla

Postoje këtë artikull në: