Kryeministri grek, Antonis Samaras, i ka thënë ish-presidentit amerikan Bill Klinton se Greqia është në një “Depresion të Madh” duke përdorur të njëjtin term që u përdor për të karakterizuar depresionin në Shtetet e Bashkuara gjatë viteve 30 të shekullit të kaluar. Deklarata e kryeministrit Samaras u krye dy ditë përpara se në Athinë të mbërrijë grupi monitorues i trojkës së kreditorëve globalë. Ata pritet të shtojnë presionin që Athina të realizojë reduktimet e premtuara të shpenzimeve një kusht thelbësor që të lëvrohet kësti i radhës i ndihmës financiare dhe që garanton shmangien e falimentit të pakontrolluar dhe kaotik.

Aktualisht Athina synon të zbusë kushtet e ndihmës financiare të parashikuar në marrëveshjen 130 miliardë euro të muajit mars. Kërkesa synon të zbusë efektet e paketës në ekonominë greke që gjendet në recesionin më të thellë që nga lufta e dytë botërore. Deri në fund të këtij viti ekonomia e Greqisë parashikohet të tkurret me një të pestën dhe do të jetë viti i pestë i recesionit që nga viti 2008. në tremujorin e parë papunësia në Greqi u rrit në 22.6% dhe ekonomia është dëmtuar nga rritja e taksave, reduktimi i shpenzimeve buxhetore, kushte të kërkuara nga bashkimi europian dhe fondi monetar ndërkombëtar. "ju keni pasur një depresion të madh në shtetet e bashkuara. Kjo është ajo çfarë po kalojmë ekzaktësisht ne në këto ditë. Ky është versioni grek i depresionit të madh”, i tha Samaras presidentit Bill Klinton që ishte në krye të një delegacioni biznesmenësh greko-amerikanë.

Athina në fund të vitit 2014 duhet të ulë deficitin në 3% të totalit të ekonomisë kundrejt 9.3% që regjistroi në fund të 2011. Athina duhet të kursejë 12 miliardë euro më shumë dhe të rrisë taksat të cilat do të shtohen në reduktimin 17 miliardë euro që miratoi qeveria e mëparshme teknike. Qeveria kërkon më shumë kohë nga kreditorët në realizimin e synimeve. Por europianët janë të frustruar dhe kërkojnë respektimin e marrëveshjeve. Shenjë e këtij frustrimi është raportimi nga "Der Spiegel" se fondi monetar ndërkombëtar nuk do të jetë më pjesë e programeve të ndihmës financiare për Greqinë. Përgatiti: Ermal Ngjelina

Postoje këtë artikull në: