Dhjetëra emigrantë elbasanas kanë nisur plotësimin e dokumentacioneve për pagesën vullnetare të sigurimeve shoqërore. Sipas kryetarit të degës së kontributeve në drejtorinë rajonale të ISSH-së, Shkëndi Rusi, emigrantët që janë në prag të plotësimit të moshës së pensionit dhe nuk kanë vjetërsinë e punës për të përfituar pension, duhet të plotësojnë vitet e pasiguruara përmes sigurimit vullnetar.

Gjatë 6-mujorit të parë të këtij viti 892 emigrantë elbasanas kanë bërë sigurimin vullnetar të tyre. Vetëm gjatë këtij muaji, sipas Rusit, numri i emigrantëve që janë paraqitur për të bërë sigurimin vullnetar është 120 persona. Kontributi mujor aktualisht është 3790 lekë në muaj, por në rast parapagese ISSH ofron zbritje të tarifave 6% për një parapagesë vjetore, 3% për një parapagesë 6-mujore, dhe 1.55% për një parapagesë 3-mujore. Për të përfituar pension të plotë pleqërie nevojiten 35 vite pune, ndërsa një pension i pjesshëm përfitohet me jo më pak se 15 vite pune.

Postoje këtë artikull në: