Lamtumirë “16+1”? – Reuters: Kina po mendon ta shtyjë, për shkak të presionit
Kina po mendon të shtyjë iniciativën “16+1”, pjesë e së cilës është edhe Shqipëria, shkruan Reuters duke cituar burime pranë Bashkimit Europian.
Samiti i Kinës me vendet e Europës qendrore dhe lindore, i cili mbahet çdo vit, kësaj here parashikohet të mbahet në Sofje. Pekini zyrtar, thotë Reuters, jo vetëm që po mendon ta shtyjë, por, nga ana tjetër po mendon që ta mbajë një samit të tillë çdo dy vite, dhe jo çdo vit.
Sipas Reuters, shkak për këtë ndryshim politike të Pekinit vjen pas rritjes së ndjeshme të shqetësimeve në vendet kryesore të Bashkimit Europian se, Kina nëpërmjet iniciativë një rrip një rrugë po kërkon të përçajë kontinentin.
Nga ana tjetër, tërheqja e mundshme e Kinës nga Europa mund të jetë edhe rrjedhojë e politikave që po ndjek Brukseli, që aktualisht po mendon se si të shtrëngojë rregullat në mënyrë që të frenojë blerjen e kompanive dhe korporatave europiane nga kompanitë kineze. Zyrtari i lartë i Bashkimit Europian, në kushte anonimati pohon për Reuters se, “16+1” nuk do të vdesë si iniciativë, por do të jetë më pak intensive dhe do të zhvendoset më shumë drejt bisedimeve dypalëshe.
Muajin e kaluar, Angela Merkel i bëri thirrje vendeve anëtare të Bashkimit Europian që të mos marrin pjesë në projekte infrastrukturore të promovuara apo drejtuara nga qeveria kineze. Shqipëria, duke qenë se është vendi me investimet më të pakta të Kinës në rajon në projekte madhore, do të jetë për rrjedhojë edhe vendi që do të dëmtohet më pak nga ky ndryshim politikash.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.