Lançohet Axhenda Dixhitale e Ballkanit Perëndimor – BE grant 30 mln euro për vendosjen e internetit broadband në rajon
Bashkimi Europian do të vërë në dispozicion të Ballkanit Perëndimor një grant me vlerë 30 milionë euro për vendosjen e internetit broadband në rajon, mobilizimin e investimeve strategjike si dhe për të nxitur rritjen socio-ekonomike.
Kjo u bë e ditur pas lançimit të Axhendës Digjitale të Ballkanit Perëndimor më 25 qershor në Sofje të Bullgarisë. Ajo synon të mbështesë tranzicionin e rajonit në një ekonomi dixhitale dhe të sjellë përfitime nga transformimi dixhital, si rritje më të shpejtë ekonomike, më shumë vende pune dhe shërbime më të mira për qytetarët.
Sipas Komisioneres për Ekonomi dhe Shoqëri Dixhitale, Marija Gabriel, do të nxisë modernizimin e administratës publike dhe do të ndihmojë po ashtu në përmirësimin e klimës së biznesit.
“Angazhimi në Agjendën Dixhitale do të sigurojë që qytetarët të kenë aftësi për të plotësuar kërkesat e ekonomisë së re dhe do të ndihmojnë në modernizimin e administratave publike, në forcimin e sigurisë kibernetike, në rritjen e lidhjes dhe në përmirësimin e klimës së biznesit”, tha Gabriel.
Komisioni së bashku me ministrat nga gjashtë partnerët e Ballkanit Perëndimor, Shqipëri, Bosnje Hercegovinë, Kosovë, Mal i Zi, Maqedoni dhe Serbi do të angazhohen për hapjen e internetit broadband në Ballkanin Perëndimor. Ndërkohë, paketa e asistencës teknike është miratuar tashmë për Shqipërinë nga Korniza e Investimeve të Ballkanit Perëndimor (ËBIF), si një nga paketat e para të investimeve.
Rritja e sigurisë kibernetike është po ashtu një ndër objektivat e BE-së dhe rajonit të Ballkanit Perëndimor.
Ndërkohë, një tjetër pikë kyçe e axhendës është edhe forcimi i ekonomisë dhe shoqërisë digjitale, ku ajo do të mbështesë vendosjen e mjeteve të e-qeverisjes, e-prokurimit dhe e-shëndeti. Kjo synohet të arrihet duke mbështetur përfshirjen dhe përfaqësimin e vendeve të rajonit të Ballkanit Perëndimor në nismat e BE-së.
Po ashtu, tjetër prioritet i axhendës është edhe rritja e kërkimit dhe inovacionit. Sipas Komisionit Europian, integrimi i Ballkanit Perëndimor në një zonë dixhitale në Europë do të sjellë një gjeneratë të re të studiuesve dhe inxhinierëve dhe do të promovojë bashkëpunimin ndërdisiplinor në të gjithë Europën.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.