Largimet e padrejta nga puna, “gropa” e Tatimeve – KLSH: 198 punonjës fituan gjyqet, përfituan 3.7 milionë dollarë dëmshpërblime

Drejtoria e Përgjithshme e Tatimeve është një prej institucioneve që prej vitesh paguan kosto mjaft të kripura ndaj punonjësve të larguar nga puna të cilët kanë fituar në gjykata të drejtën e kthimit në vendet e punës apo dëmshpërblim. Auditimi i kryer nga Kontrolli i Lartë i Shtetit mbi këtë drejtori gjatë vitit 2021 zbardh se bëhet fjalë për miliona dollarë të paguar vit pas viti për shkak të këtij fenomeni.

Raporti i sapopublikuar i Kontrollit të Lartë të Shtetit bën me dije se gjatë vitit 2020 nga buxheti i Drejtorisë së Përgjithshme të Tatimeve janë likuiduar shpenzime për zbatimin e vendimeve gjyqësore të formës së prerë për ish punonjës të larguar nga puna në mënyrë të pa drejtë, në vlerën 377 milionë lekë, afërsisht 3.7 milionë dollarë për 198 punonjës, e cila konsiderohet efekt financiar negativ në buxhetin e shtetit. Kjo vlerë është 2.7 herë më e lartë se vlera e shpenzuar për këtë qëllim gjatë vitit 2019 (140 milionë lekë apo afërisht 1.4 milionë dollarë).

Detyrimi i ngelur për DPT më 31.12.2020 për zbatimin e vendimeve gjyqësore për punonjësit e larguar nga puna është në vlerën 184 milionë lekë, apo rreth 1.8 milionë dollarë për 168 punonjës.

Fakti që ish punonjësit e larguar nga puna kanë fituar proceset gjyqësore, konkludon KLSH, tregon se procesi i largimit të punonjësve nga puna ka qenë i pa rregullt dhe nga institucioni i DPT nuk janë zbatuar kërkesat e kuadrit rregullator në fuqi për këtë proces. Vendimet gjyqësore nuk janë analizuar nga Titullari i Drejtorisë së Përgjithshme të Tatimeve dhe nuk është kërkuar prej tij nxjerrja e përgjegjësive për këto vendime, thekson në raport Kontrolli i Lartë i Shtetit.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.