Largimi nga detyra i kreut të DPSHTRR – Ja kë komandon Gjiknuri në krye të këtij institucioni
Pas dorëheqjes së kreut të Drejtorisë së Përgjithshme të Shërbimeve të Transportit Rrugor, Arben Isaraj, këtë institucion do ta drejtojë përkohësisht Azbi Arapi. Ministri i Infrastrukturës dhe Energjisë, Damian Gjiknuri, ka komanduar këtë të fundit, aktualisht me detyrë Zëvendësdrejtor i Përgjithshëm Ekonomik që të kryejë edhe detyrën e kreut të DPSHTRR-së.
“Për të mos kolapsuar punën institucionale në Drejtorinë e Përgjithshme të Shërbimeve të Transportit Rrugor (DPSHTRR), Ministri i Infrastrukturës dhe Energjitikës z.Damian Gjiknuri komandoi z.Azbi Arapi, aktualisht me detyrë Zëvendës Drejtor i Përgjithshëm Ekonomik, të kryejë gjithashtu detyrën e Drejtorit të Përgjithshëm të DPSHTRR-së, datë më 01.11.2018”, thuhet në njoftimin e DPSHTRR.
Azbi Arapi ka lindur në tetor të vitit 1970, në qytetin e Burrelit. Pasi ka ndjekur studimet e larta (1989-1992) në fakultetin Gjeologji Miniera, Arapi ka vazhduar studimet në universitetin “Luigj Gurakuqi”, në degën Administrim Biznes, i kualifikuar me titull “Drejtues Biznesi”.
Eksperienca dhe karriera e tij në fushën e biznesit ka vazhduar si në territorin shqiptar, po ashtu edhe në atë ndërkombëtar. Ndër eksperiencat e punës, theksojmë menaxhimin e një kompanie greke dhe për shumë vite përfaqësimin e kompanisë Amerikane Trimble GmbH. Gjatë viteve 2004-2012 ka kryer detyrën e Administratorit të Përgjithshëm për kompaninë GEOTRIM shpk.
Z.Arapi ka qenë pjesëmarrës në shumë aktivitete rajonale dhe botërore (USA, Gjermani, Poloni, Zvicër, Itali, Kore, Kinë, Greqi, Çeki). Është trajnuar në Gjermani për rekrutimin e punonjësve në kompani të mëdha, për menaxhimin e grupeve të punës, funksionimit të shoqërive tregtare, ekspertizën kontabël, orientimin e politikave të zhvillimit, iniciator dhe udhëheqës i projektit të implementimit të sistemit VRS nga Trimble Group në Shqipëri.
Jeta e tij aktive politike dhe institucionale zë fill që në vitin 2000, duke dhënë kontributin e tij menaxherial në shtabet elektorale. Në vitin 2011 kandidoi për Kryetar Komune në Paskuqan. Në vitin 2013 dhe në vitin 2017, ishte kandidat në listën e Zgjedhjeve të Përgjithshme për PS dhe Anëtar i Asamblesë Kombëtare të Partisë Socialiste. Në vazhdim, përveç jetës aktive politike ku aderon, Arapi ka mbajtur që nga viti 2013 deri në shtator të vitit 2018, postin e Drejtorit të Drejtorisë Minerare (AKBN). Së fundmi, emërohet Zëvendës Drejtor i Përgjithshëm Ekonomik në DPSHTRR duke kaluar si titullar i saj më 01.11.2018.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.