Largohen bankënotat 500 euro – Eurozona ndalon emetimin. Gjermania dhe Austria, më vonë gjatë vitit
Bankat Qendrore në 17 nga 19 vendet e Eurozonës, ndaluan emetimin e bankënotave 500 euro më datë 27 Janar, por Gjermania dhe Austria e vonuan këtë lëvizje për më vonë gjatë vitit. Bundesbanku gjerman dhe Osterreichische Nationalbank e Austrisë, deklaruan se i duhet më shumë kohë që të sigurojnë një tranzicion të lehtë drejt një sistemi ku 200 euro do të jetë prerja më e madhe. Banka Qendrore Europiane ndaloi prodhimin e banknotës 500-she në vitin 2016, duke përmendur përdorimin e kësaj në aktivitete të jashtëligjshme si pastrimi i parasë, evazioni fiskal dhe financimi i terrorizmit.
Kartëmonedha njihet ndryshe si “Bin Laden” për shkak se i ofron kriminelëve që të transportojnë sasi të mëdha paraje në një hapësirë të vogël. Por, ndërkohë që reagimi i vendeve të tjera ka qenë i heshtur, kritikat janë përhapur në Gjermani, ku shumë persona kujtojnë me nostalgji kartëmonedhën me prerje 1,000 marka gjermane, përpara se euro të prezantohej në vitin 2002.
Shefi i Bundesbank-ut, Jens Weidmann e ka kundërshtuar vendimin e zhdukjes së prerjes 500-she, duke argumentuar se do ketë pak ndikim në luftën kundër krimit, përkundrazi, do të dëmtojë besimin te euro. Reagimi nuk ishte surprizues, pasi shumica e gjermanëve, pavarësisht se nuk paguajnë me 500 euro, kanë qenë këmbëngulës në krahasim ne europianët e tjerë për të zëvendësuar paranë cash me pagesa alternative. Sipas një studimi të Bankës Qendrore Europiane, një gjerman mesatar mban më shumë se 100 euro në portofol.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.