Legalizim trualli për 2 mijë familje – Lame: Qytetarët të nisin procedurat nga data 28 Maj
Rreth 2 mijë familje në të gjithë vendin do të mund të marrin pronësinë e truallit mbi të cilin kanë ndërtuar pa leje. Kështu nga data 28 maj, qytetarët mund të paraqiten pranë drejtorive rajonale të Agjencisë së Legalizimit për të bërë pagesën përkatëse dhe për të mbyllur këtë proces.
Drejtori i Përgjithshëm i ALUIZNI-t, Artan Lame ka bërë e dije se ky proces ka qenë i bllokuar që nga viti i kaluar dhe tashmë me vendimet e marra një ditë më parë në mbledhjen e qeverisë, i është hapur rruga legalizimit të truallit dhe më tej hipotekimit të plotë të pronës së qytetarëve, ndërsa do të kompensohen edhe pronarët e ligjshëm.
Ndërkaq, Lame u ka bërë apel ndërtuesve të cilët i kanë braktisur pallatet, të nisin procesin e legalizimit, duke lënë afat 1 javë kohë, në të kundërt paralajmëron masa të ashpra.
Në fund të afatit një javor, për ndërtuesit që nuk reagojnë dhe nuk nisin procedurat përkatëse, do të bëhen me dije edhe masat administrative me të cilat do të përballen.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.