Legalizimet, 80% e të dhënave në gjendje të mjerë – Alarmi I KLSH: Ligji u ndryshua 10 herë, hartat s’përputhen, krijojnë diferenca me 100 metra

Një auditim i ushtruar nga Kontrolli i Lartë i Shtetit mbi procesin e legalizimeve në tërësi zbardh defekte të rënda që nisin që prej ndryshimeve shumë të shpeshta të ligjit, gjë që ka ndodhur 10 herë në rreth 15 vite, mungesës së akteve nënligjore, por veçanërisht te problematikat e rënda që kanë të bëjnë me hartat si dhe me regjistrat e pasurisë, të cilët, në pjesën dërrmuese janë në gjendje të mjerë.

Problematika që është vërejtur në aspektin legjislativ të procesit të legalizimit është se ky proces ka rezultuar i shkëputur nga veprimtaria e punës në zyrat e regjistrimit të pasurive të paluajtshme, çka ka  sjellë  probleme  apo  ngërçe  në  regjistrime  të  pasurive  të  paluajtshme  të  përfituara  me  leje legalizimi, thekson Kontrolli i Lartë i Shtetit.

Kjo problematikë ka qenë e theksuar  në veçanti para krijimit të Agjencisë Shtetërore të Kadastrës, ku ZRPP dhe ALUIZNI vepronin si dy institucione të veçanta, çka sillte që edhe procesi në  fakt  të  ishte  i  ndarë  në  dy  institucione  dhe  në  dy  baza  ligjore  krejt  të  ndryshme.  Si  rrjedhojë, ndryshimet  në  kuadrin  rregullator  të  legalizimit rezultonin  të  mos  ishin  të  unifikuara  me  bazën ligjore mbi të cilën vepronte regjistrimi i pasurive të paluajtshme e për rrjedhojë lindte fenomeni që qytetari  të  përfitonte  lejen  e  legalizimit  por  t’i  refuzohej  regjistrimi  nga  ZRPP  për  shkak  të mospërputhjeve  me  plan-vendosjen  e  pasurisë  dhe  me  statusin  juridik  të  pronave.

Në fakt, konstaton KLSH, procesi i legalizimit ka qenë aq i mbuluar me akte ligjore dhe nënligjore, që ndryshonin në mënyrë  sistematike,  saqë  ka  krijuar  bindjen  se  problematika  buron  nga  baza  ligjore  dhe  zgjidhja natyrshëm duhet të vinte me bazë ligjore. Por,  mungesa e një unifikimi në bazë ligjore, veçanërisht për  periudhën  2017-2019(para  krijimit  të  ASHK)  është  shoqëruar  me  një  mungesë  unifikimi  edhe në  aspektin  e  hartografisë,  e  cila  në  fakt  përbën  bazamentin  e  problemeve  dhe  zgjidhjeve  në trajtimin e legalizimit. Hartat vektoriale ekzistuese të regjistrimeve të para janë në përmasat 2,500 x 2,500 për çdo zonë kadastrale.

Këto të dhëna janë të pa përditësuar dhe 20 vjeçare (para vitit 2000). “Linjat vektoriale mbivendosen mbi ortofotot e vitit 2007 të cilat nuk përputhen me njëra tjetrën dhe krijojnë  diferenca  me  100  m.  Të  dhënat  e  Bankës  Botërore tregojnë  se  80%  e  regjistrimeve  të pronave mbahen në formë shkresore dhe në gjendje mjaft të mjerë”, thekson në raport KOntrolli i Lartë i Shtetit.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.