Legalizimi i shtesave në pallate, Gjermeni: Nuk do të përjashtohet asnjë familje. Lame: Mos pranoni shërbime sekserësh, procesi do kryhet falas
Disa javë pas miratimit të Vendimit të Këshillit të Ministrave për legalizimin e shtesave në kate dhe në pallate, ministrja e Zhvillimit Urban, Eglantina Gjermeni dhe Drejtori i Përgjithshëm i ALUIZNI, Artan Lame kanë pasur një takim konsultues me banorë të Njësisë nr. 7 në Tiranë.
Ministrja Gjermeni bëri me dije se, pavarësisht problematikës së hasur, kryesisht në mbledhjen e informacionit të plotë për numrin e pallateve që duhet të legalizohen, të gjitha familjet që preken nga kjo VKM, do të kenë në duart e tyre lejen e legalizimit për banesat e tyre.
Për këtë, Gjermeni nënvizoi si shumë të rëndësishme bashkëpunimin e banorëve.
“Në këto tre vite u fokusuam në përmbylljen e procesit të legalizimeve në zonat masive informale, duke bërë të mundur legalizimin e mbi 96,425 objekteve. Sa i takon legalizimit të shtesave në pallatet ku ju jetoni, ndihma dhe bashkëpunimi juaj është shumë i rëndësishëm në identifikimin e problemeve dhe hartimin e dokumentacionit të nevojshëm që, më pas, do të ndiqet tërësisht falas nga ALUIZNI. Më lejoni t’ju siguroj që, në mënyrë të padiskutuar, ju dhe të gjitha familjet, në të gjithë vendin që kanë derdhur djersën e tyre për blerjen e një shtëpie, në pallate që preken nga VKM-ja që miratuam në muajin Janar, do të marrin lejen e legalizimit”, tha ministrja në fjalën e saj.
Pas shqetësimit të disa prej banorëve për individë, të cilët gjatë këtyre javëve janë paraqitur pranë pallateve për të mundësuar legalizimin në këmbim të pagesës, Drejtori i ALUIZNI, Lame i bëri thirrje qytetarëve të mos pranonin “shërbime sekserësh”, pasi sipas tij, procesi do të kryhet FALAS dhe vetëm nga punonjës të ALUIZNI.
Me vendimin që qeveria miratoi në muajin Janar të këtij viti, i hapet rruga afro 30 mijë familjeve shqiptare, për të kryer procedurën e legalizimit dhe më pas hipotekimit pranë Zyrave të Regjistrimit të Pasurive të Paluajtshme për banesën që posedojnë në rreth 1 300 pallate.
Vendimi i miratuar parashikon që, ALUIZNI ka detyrimin e njoftimit të ndërtuesit apo investitorit, të cilëve u është lënë një afat prej 30 ditësh, për kryerjen e procedurave të legalizimit për objektin.
Në ato raste kur, ndërtuesit apo investitori nuk do t’i përgjigjet njoftimit brenda afatit të përcaktuar, atëherë i lind e drejta qytetarit të paraqesë pranë ALUIZNI, kërkesën për legalizimin dhe hipotekimin e objektit që disponojnë. Në zbatim të Vendimit të miratuar, qytetarët nuk kanë asnjë detyrim financiar apo kosto shtesë për të paguar ndaj shtetit, pra e thënë ndryshe, procedura e legalizimit për qytetarët do të jetë tërësisht falas.
Ndërkohë që, ndërtuesit apo investitorit i lind detyrimi fiskal për pagesën e taksës së infrastrukturës për objektin e ndërtuar.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.