Legjislatura e re, Rama: Fitore e thellë, përgjegjësi më e madhe për vendin
Pas zgjedhjeve të 25 qershorit ku Partia Socialiste siguroi mbajtjen e timonit e vetme, Rama ka zhvilluar një takim me deputetët e rinj.
Kryeministri Edi Rama gjatë takimit me 73 deputetët e rinj dhe kryetarët socialistë të bashkive ka falënderuar këdo që kontribuoi në këtë fitore historike për partinë, që në të njëjtën kohë ju ka shtuar përgjegjësin ndaj qyteteve për të vazhduar në rrugën e reformave dhe në krijimin e shtetit të së drejtës.
“Më lejoni të falënderoj partnerët e mandatit që po mbyllet. Në radhë të parë për votat që dhanë për reformat shtetbërëse, të cilat do ti thellojmë më tej me kurajo politike, me vendosmëri atdhetare dhe gatishmëri për dialog me opozitën dy ngjyrëshe. Dua të falënderoj Ilir Metën, natyrisht jo për gjërat që i çoi për dreq, me arsyen kronike të mos arsyes së tij duke hedhur në erë projektin e së majtës së bashkuar, por për çdo kontribut pozitiv që dha në punën e përbashkët. Po në emrin tuaj, por edhe të deputetëve socialist që e votuan dua ti lutem sot të reflektojë sot dhe të kthjellohet njëherë e mirë si presidenti që i mori votat tona për të qenë konsensual jo konfliktual, për të qëndruar mbi palët dhe jo për të qenë palë kundër palëve të tjera dhe të përqendrohet sa nuk është vonë tek riparimet e dëmeve të papara në këto 27 vjet që i bëri figurës së kreut të ri të shtetit që i bëri gjatë 40 ditëve të fundit. LSI përpara Shqipërisë është një vrimë në ujë dhe përjetimi tragjik i daljes së partisë së tij personale nga roli i çelësit për shumicën qeverisëse nuk duhet ta damkosë si komike pa hyrë ende në zyrën figurën e presidentit të zgjedhur të shqiptarëve pa dallim”, tha Rama.
Rama nuk ka harruar as të falënderojë por edhe të thumbojë aleatin e tij të katër viteve të shkuara Ilir Meta. Sipas Ramës Meta duhet të kthjellohet si president pasi është votuar për të qenë konsensual.
Më tej Rama ka shtuar se për interes të vendit do ti shtrijë dorën e bashkëpunimit opozitës PD-LSI, ndërsa përsëriti edhe njëherë se marrëveshja e 18 majit do të jetë busull orientuese për marrëdhëniet mes qeverisë dhe opozitës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.