Lehtësi fiskale për agroturizmin – Ulet TVSH-ja dhe tatim-fitimi për 10 vjet

Sipërmarrjet që do të regjistrohen dhe certifikohen si agroturizëm për një periudhë 3 vjeçare, do të përfitojnë lehtësira fiskale nga qeveria.

TV SCAN ka siguruar vendimin “Për miratimin e kritereve për certifikimin e veprimtarisë së agroturizmit” i cili do të miratohet në mbledhjen e Këshillit të Ministrave.

Vendimit përcakton qartazi standardet që duhen plotësuar për të hyrë në këtë kategori dhe këto sipërmarrje për 10 vite do ta kenë Tatimin mbi Vlerën e Shtuar në masën 6 për qind dhe Tatimin mbi Fitimin në masën 5 për qind  nga 15 për qind që është aktualisht.

Ndërsa ata që do të ndërtojnë struktura të reja në këtë sektor, do të jenë për 10 vjet të përjashtuar nga taksa e ndikimit në infrastrukturë. Pas 3 viteve nga hyrja në fuqi e këtij vendimi, rikthehet regjimi normal i taksave.

Pra çdo sipërmarrje që do të regjistrohet si agroturizëm, pas 3 viteve, nuk do të përfitojë nga këto lehtësi.

Subjektet, që zhvillojnë veprimtari pritëse të klasifikuar si “agroturizëm”, duhet të ofrojnë, minimalisht, njërin nga shërbimet e mëposhtme: a) Akomodim; b) Ushqim dhe pije; c) Veprimtari argëtuese/çlodhëse, të lidhura me fermën ose mjedisin përreth.

Vendimi vendos detyrimin për të gjithë subjekte ekzistuese që përdorin emërtimin agroturizëm, që të aplikojnë brenda 6 muajve për çertifikimin e tyre.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.