Lehtësim i procedurave doganore – Kompjuterizimi i transitit do të ulë evazionin

Sistemi i transitit në doganat shqiptare  do të jetë pjesë e atyre evropiane, çka do të bëjë të mundur uljen  e evazionit fiskal,  zhvillimin e strategjive dhe procedurave të reja kundër mashtrimit. Këto janë ato që janë përfituar nga projekti “Modernizimi i Administratës Doganore shqiptare në fushën e transitit”, i financuar nga Bashkimi Evropian dhe qeveria shqiptare. Drejtore e Përgjithshme e Doganave, Belinda Ikonomi, u shpreh gjatë takimit përmbyllës të këtij projekti, se implementimi  do të bëjë të mundur lehtësimin e qarkullimit të mallrave dhe lehtësi për biznesin.

“ Ky projekt binjakëzimi i nisur në janarin e 2016 dhe i fokusuar në një aspekt shumë të rëndësishëm siç është fusha e transitit ka qenë një kontribut i çmuar, duke ju bashkuar përpjekjeve tona të përditshme në forcimin e efikasitetit, përgjegjshmërisë dhe besimit të publikut në administratën doganore.

Aktivitetet e zhvilluara gjatë kësaj periudhe dyvjeçare jo vetëm i kanë dhënë vizibilitet institucional këtij projekti, por kanë ndikuar dukshëm në synimin për të mbërritur në një kuadër të ri ligjor mbi Procedurat, Sistemet dhe Luftën Kundër Mashtrimit në përputhje me acquis të BE-së dhe praktikat më të mira të Konventës së Transitit të Përbashkët.

Ky projekt binjakëzimi shënon hapin e parë të përgatitjes së Shqipërisë për zbatimin e Sistemit të Ri të Kompjuterizuar të Transitit (NCTS) , një sistem thelbësor për Administratën Doganore Shqiptare që thjeshton procedurat administrative të operatorëve shqiptarë dhe të huaj, si dhe parandalon mashtrimet duke garantuar nivelin më të lartë të mundshëm të sigurisë nëpërmjet krijimit të një mjedisi pa letër”, është shprehur znj. Ikonomi, e cila ka falënderuar BE për ndihmën dhe besimin, po ashtu palën italiane dhe atë Franceze për mbështetjen dhe bashkëpunimin.

Ndërsa Ambasadorët e Italisë dhe Francës, si dy vende  partnere  në këtë projekt, nënvizuan rëndësinë e tij në lidhje me konkurrueshmërinë e  doganave dhe  rritjen e punësimit.

“Projekti është një kontribut për forcimin e ekonomive të dy vendeve dhe marrëdhënieve mes dy doganave. Implementimi i një sistemi modern do të ketë ndikime pozitive në Administratën Doganore”, tha në fjalën e tij përshëndetëse, Ambasadori i Italisë, Alberto Cutillo.

Ambasadorja e Francës, Christina Vasak përgëzoi Drejtoreshën e Përgjithshme të Doganave për drejtimin e këtij kantieri modernizimi në doganën shqiptare.

Ky projekt u përqendrua në dy komponentë të rëndësishëm si legjislacioni  dhe procedurat doganore që lidhen me sistemin e IT  me NCTS të BE-së, si dhe  zbatimin  dhe inteligjencën e transitit doganor. Projekti u zbatua  në periudhën janar 2016-dhjetor-2017.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.