Lehtësitë doganore – Biznesi italian kërkon thjeshtim procedurash
Përshpejtimi dhe thjeshtimi i procedurave doganore për mallra të ndryshme, ulja e kostove fizike dhe dokumentacioneve, si dhe heqja e çmimeve të referencës.
Këto problematika u diskutuan gjatë një takimi informues mes përfaqësuesve të Confindustria Albania dhe Drejtorisë së Përgjithshme të Doganave.
Sipas Presidentit të kësaj organizate, Donato D’Agostino, duhet një bashkëpunim më i madh me doganat dhe për të thjeshtuar procedurat dhe eliminuar problematikat mund të ngrihen dhe komisione teknike të përbashkëta.
Ndërsa Zëvendësdrejtore e Përgjithshme e Doganave, Mirela Meko theksoi, se më hyrjen në fuqi të dispozitave të Kodit të ri doganor, do të bëhen efektivë shumë procedura lehtësuese për biznesin.
Vetëm dy muaj më parë Drejtoria e Përgjithshme e Doganave nënshkroi një protokoll bashkëpunimi me Confindustria Albania, me synim për të lehtësuar dhe mbështetur operimin e kompanive të huaja, sidomos ato italiane në vendin tonë.
Sipas këtij protokolli, thjeshtimi i mjaft procedurave doganore, ka lehtësuar veprimet administrative të sipërmarrjes në pikat doganore.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.