Lejet e ndërtimit. Llogariten në 145 për tremujorin e tretë 2016
Numri i lejeve të ndërtimit në vend regjistroi rritje për të katërtin tremujor radhazi. Sipas të dhënave nga Instituti i Statistikave, numri total i lejeve të ndërtimit të miratuara në të gjithë vendin në tremujorin e tretë të vitit ishte 145, nga 98 që kishin qenë lejet në tremujorin e dytë.
Qarqet me numrin më të lartë të ndërtimeve të reja në tremujorin e tretë të këtij viti ishin Tirana me 29 leje dhe Elbasani me 28 leje ndërtimit. Mbështetur në të dhënat mbi vlerën e parashikuar të ndërtimit, vërehet se investimet e parashikuara në lejet e reja janë rritur si për punimet inxhinerieke, ashtu edhe për ndërtesat. Secila nga degët e ka dyfishuar vlerën e ndërtimit të parashikuar nga lejet.
Në total, vlera e ndërtimit për lejet e dhëna në tremujorin e tretë ka arritur në afro 8.7 miliardë lekë. Rritja e numrit të lejeve të ndërtimi dhe e investimeve të parashikuara rrit pritshmëritë për një kontribut më të lartë të ndërtimit në rritjen ekonomike.
Sipas të dhënave nga Instat, ndërtimi ka qenë ndër kontribuesit kryesorë të rritjes ekonomike në gjysmën e parë të vitit. Për 6-mujorin 2016, rritja e ndërtimit ka qenë mesatarish 4.7%, por kjo rritje ka qenë e përqendruar kryesisht në tremujorin e parë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.