Lejet e ndërtimit – Sistemi online me mangësi, 6 institucione ende me dokumente në letër

Sistemi online i lejeve të ndërtimit është i paplotë, duke qenë se një sërë dokumentesh që janë të detyrueshme, nuk mund të merren elektronikisht, por nëpërmjet një procesi pune të veçantë dhe në letër.  Bëhet fjalë për lejet që jepen nga Agjencia Kombëtare e Mjedisit, Ministria e Turizmit dhe Mjedisit, Agjencia e Shërbimit Arkeologjik, Instituti i Monumenteve të Kulturës, Agjencia e Menaxhimit të Burimeve Ujore dhe Zyrat e Administrimit të Baseneve Ujore.

Në sistemin aktual këto institucione japin mendimin e tyre nëpërmjet ndërfaqes së dedikuar, por nuk e kanë mundësinë që të realizojnë çdo hap ku kalon aplikimi brenda strukturës së tyre organizative, duke sjellë vonesa për ata që aplikojnë për çdo dokument që lidhet me ndërtimin, duke përfshirë lejet e zhvillimit, lejet e ndërtimit, deklaratën paraprake, shtyrjen e afatit, etj. Kjo është edhe arsyeja që Agjencia Kombëtare e Shoqërisë së Informacionit ka hapur një procedurë prokurimi, e cila ka për qëllim përmirësimin e sistemit, duke evituar dokumentet në letër. Vlera totale e kontratës së shpallur kap vlerën e 116.6 milion lekëve, ndërkohë që ofertat nga kompanitë e interesuara mund të dorëzohen deri në datën 23 korrik 2018.

Qëllimi kryesor i kësaj kontrate është pikërisht Përmirësimi i klimës së biznesit në drejtim të lehtësimit të procedurave për aplikimin për leje, duke dixhitalizuar edhe hallkën e miratimit të lejeve nga institucionet e mësipërme.  Sistemi e-leje ka filluar funksionimin nga data 1 shtator 2016  dhe mundëson që aplikimi, pranimi dhe shqyrtimi i kërkesave për dokumentet ndërtimore dhe ndërveprimi institucional të kryhet ekskluzivisht nëpërmjet tij.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.