Librat falas – Gjini: Përfitojnë 125 mijë nxënës. Shpërndarja në shkolla deri në 17 shtator
Nxënësit që ndjekin arsimin fillor nga klasa e parë deri në klasën e katërt do të përfitojnë tekstet shkollore falas. Sipas vendimit të Këshillit të Ministrave, çmimi i blerjes së tyre do të mbulohet 100% nga fondet e buxhetit të shtetit.
Blerja e teksteve në emër të prindërve për llogari të nxënësve do të kryhet nga institucioni arsimor. Drejtorja e drejtorisë së arsimit parauniversitar pranë Ministrisë së Arsimit, Zamira Gjini, theksoi se shpërndarja do të bëhet në shkolla dhe pritet që për këtë vit shkollor të përfitojnë rreth 125 mijë nxënës.
“Tekstet falas do t’i marrin të gjithë nxënësit e klasës së parë deri në klasën e katërt. Janë rreth 125 mijë nxënës, por krahas tyre do të vazhdojnë të marrin tekstet falas edhe të gjithë ato kategori të nxënësve, të cilët i kanë marrë tekstet falas edhe vitet më parë, siç janë kategoritë e nxënësve me aftësi të kufizuara, nxënësit rom dhe egjiptianë, nxënësit që vuajnë paraburgimin, apo edhe kategori të tjera, shtresa sociale, të cilat i kanë marrë tekstet falas por që i takojnë klasave nga klasa e pestë deri në klasën e dymbëdhjetë”, njoftoi Gjini.
Ndërkohë, sa i takon likuidimit të faturës tatimore ndaj subjekteve, shtëpive botuese, realizohet nga njësia arsimore vendore, me fondet e miratuara si “Transfertë tek individët” për zbatimin e këtij vendimi është parashikuar një fond prej 270 milionë lekësh, i parashikuar në buxhetin e miratuar në vitin 2018.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.