Librat shkollorë falas – ACE: MAS të marrë masa, të pajisë të gjithë nxënësit

Koalicioni për Arsimin në Shqipëri i kërkon qeverisë dhe në mënyrë të veçantë Ministrisë së Arsimit, të marrë masa për të siguruar librat shkollorë falas për të gjithë fëmijët e arsimit publik parauniversitar.

Nëpërmjet një deklaratë për mediat ky koalicion shprehet se, blerja e librave nga nxënësit e arsimit parauniversitar bie ndesh me ligjin nr. 69 “Për Sistemin Arsimor Parauniversitar në Republikën e Shqipërisë”, i cili përcakton se “në shkollat publike arsimi i detyrueshëm dhe arsimi i mesëm i lartë janë falas”.

E drejta për arsim falas nënkupton edhe krijimin e kushteve të nevojshme dhe të domosdoshme për t’u arsimuar. Një nga këto kushte është edhe pajisja falas me libra, fletore dhe mjete mësimore të çdo fëmije që ndjek arsimin publik.

Mospërmbushja e këtij detyrimi është një shkelje e të drejtave të fëmijëve dhe në kundërshtim të hapur me Nenin 28 të Konventës së OKB-së për të Drejtat e Fëmijës.

Lidhur me vendimin e këshillit të ministrave  nr. 707, ku përcaktohen disa kategori nxënësish në nevojë, të cilët përfitojnë tekstet shkollore falas, koalicioni për arsimin në Shqipëri e cilëson të pamjaftueshme, pasi sipas tyre, të gjithë nxënësit që ndjekin arsimin publik paruniversitar, pa dallim, duhet të pajisen me libra shkollorë falas nga shkollat përkatëse.

Kjo politikë sipas koalicionit në fjalë, do të rriste numrin e fëmijëve që ndjekin shkollën, duke pasur një ndikim të drejtpërdrejtë në ndjekjen e arsimit nga fëmijët dhe ushtrimin e të drejtës së tyre universale për arsim.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.