Licencimi i bankave, format “vetting” – Aksionerët do të verifikohen për lidhje me njerëz të krimit
Banka e Shqipërisë do të ndryshojë rregulloren për licencimin e bankave tregtare, duke forcuar ndjeshëm kontrollet mbi aksionerët dhe origjinën e kapitalit.
Projekt-rregullorja parashikon që aksionerët e shoqërive që aplikojnë për t’u licencuar si banka në Republikën e Shqipërisë, veç informacionin për burimin e të ardhurave të tyre, duhet të japin informacion mbi lidhje familjare apo marrëdhënie të ngushta personale, pune apo biznesi, me persona që janë dënuar për kryerjen e veprave penale me vendim të formës së prerë.
Në rast se Banka e Shqipërisë konstaton, apo ka dyshime të arsyeshme se struktura e kapitalit apo burimi i tij lidhet me persona të dënuar për kryerjen e veprave penale, njofton Drejtorinë e Përgjithshme të Parandalimit të Pastrimit të Parave dhe pezullon procedure e licencimit deri në një përgjigje nga kjo e fundit.
Në të njëjtën mënyrë do të veprohet edhe kur Banka e Shqipërisë konstaton, apo ka dyshime të arsyeshme se struktura e kapitalit apo burimi i tij lidhet me me kompani të regjistruara në parajsa fiskale: licencimi pezullohet deri në marrjen e informacionit nga Drejtoria e Parandalimit të Pastrimit të Parave.
Në rregulloren e re, Banka e Shqipërisë i rezervon vetes të drejtën për të refuzuar dhënien e licencës kur gjykon se aksionerët e bankës së propozuar paraqesin rrezik të lartë, ose kur banka aplikuese apo aksionerët e saj, kanë një strukturë komplekse të pronësisë, që e bën të vështirë verifikimin e plotë të kontrollit mbi aksionet apo të burimeve të kapitalit. Licencimi do të refuzohet në të gjitha rastet kur aksionerët e drejtpërdrejtë ose të tërthortë të bankës së propozuar, zotërojnë aksione të mbajtësit (bearer shares), ose janë aksionerë përfaqësues (nominee shareholders), si edhe kur aksioneri i propozuar i bankës, është një bankë guaskë. Gjithashtu, Banka e Shqipërisë mund të refuzojë aplikimin kur çmon se licencimi do të cenonte interesat e publikut.
Rregullat bazë për licencimin do të zbatohen në të njëjtën mënyrë edhe në rastet e aplikimit për ndryshimin e pronësisë mbi aksionet e bankave, në rastet kur bëhet fjalë për pjesëmarrje influencuese. Risi tjetër e rregullores është rivlerësimi periodik i aksionerëve të bankave. Vetë bankat duhet të kryejnë rivlerësimin e përshtatshmërisë së aksionerëve të miratuar nga Banka e Shqipërisë, të paktën një herë në vit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.