Lidhjet e paligjshme të ujit, vijon aksioni në kryeqytet – Ndiqen penalisht abuzuesit

Vijon aksioni për identifikimin e lidhjeve të paligjshme të ujit të pijshëm si dhe evidentimin e debive të akumuluara të abonentëve të Tiranës. Kështu, linjat e transmetimit që kalojnë në zonën e Lanabregasit kanë qenë edhe fokusi i 4 grupeve Task Forcë në kryeqytet mbrëmjen e djeshme.

Nga aksioni janë evidentuar dy lidhje të paligjshme të kryera në tubacionet kryesore të furnizimit me ujë, ku njëra prej tyre nga një subjekt familjar.

Për abonentët po kryhen edhe të gjitha procedurat e nevojshme për ndjekje penale të rastit për shakk të vjedhjes së ujit të pijshëm.

Sipas UKT-së, dyshohet se në zonën e Lanabregasit, ku kalojnë tubacionet kryesore të furnizimit me ujë ndodh mbushja e boteve të ujit për t’u shitur më pas në mënyrë abuzive te qytetarët.

Në kuadër të reformës së ujit, deri më tani janë shoqëruar në Polici 53 konsumatorë, kryesisht privatë. Ndërkohë, sipas Ndërmarrjes së Ujësjellës Kanalizimeve janë kryer 23 010 verifikime në terren, të përqendruara kryesisht në linjat e furnizimit me ujë, debitë e pashlyera të abonentëve si dhe mënjanimin e ndërhyrjes në ujëmatës.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.