Liga e “Parasë” – United rrezikon “kurorën” në Britani. Barcelona në vend të parë në Europë
Manchester United rrezikon të humbasë pozicionin si klubi me fitimet më të mëdha në Angli, ndërkohë që disa hapa të gabuara në menaxhim dhe performanca relativisht të dobëta, e përjashtuan nga gara më fitimprurëse e Europës. Pasi dështoi të kualifikohej në Ligën e Kampionëve për të dytën herë në 4 sezone, ekipi ka parashikuar një rënie të të ardhurave vjetore prej 11%.
Kjo mund ta vendosë atë pas Manchester City dhe Liverpool këtë vit dhe do të shënonte humbjen e “kurorës” për të parën herë në 23 vite, që kur britanikja Deloitte nisi raportin “Liga e Parasë”, për të ardhurat në futboll. Performanca e dobët e Manchester United vjen pavarësisht se të ardhurat totale të 20 ekipeve kryesore europiane kanë shtuar 11% në sezonin 2018-2019. Ekipi spanjoll Barcelona kryesoi renditjen e Deloitte për të parën herë, me të ardhura vjetore rekord prej 841 milionë euro, ndërkohë që Real Madrid ra në vendin e dytë, me 757 milionë euro.
Manchester United ka kërkuar për një trajner fitues që kur legjendari Alex Ferguson hoqi dorë në 2013-n. Mungesa në Ligën e Kampionëve pritet të godasë rëndë të ardhurat. Ekipi aktualisht ndodhet poshtë 4 pozicioneve të para në Premier League, që do kualifikohen për Ligën e Kampioneve të sezonit të ardhshëm. Mosmarrja pjesë në Ligën e Kampioneve ka sjellë gjithashtu rënien e Arsenal nga 10 ekipet europiane me të ardhurat më të mëdha.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.