Ligj i ri për investimet/Trajtim i barabartë edhe për vendasit. Toka e brigje shtetërore për investime strategjike
Ministria e Financave dhe Ekonomisë ka nxjerrë për konsultim publik ligjin e ri për investimet, i cili synon trajtimin e barabartë të investitorëve vendas e të huaj si dhe çdo lloj investimi që kontribuon në zhvillimin ekonomik të vendit, qoftë ky strategjik apo jo.
Në relacionin që shoqëron projektligjin evidentohet fakti se legjislacioni aktual i jep mbrojtje shtesë investimeve të huaja, por jo atyre vendase, ndërkohë që aktualisht ekziston një korpus i veçantë ligjor për investimet strategjike. Sipas draftit të paraqitur, përcaktohen parimet mbi bazën e të cilëve do të incetivohen bizneset, që lidhen kreysisht me arritjen e objektivave të veçantë të politikave si dhe kriteret përzgjedhëse transaprente dhe jodiskriminuese.
Ndërkaq, sa i takon investimeve strategjike janë përcaktuar sektorët, ku përfshihet ai: energjetik dhe minerar, transporti, infrastruktura dhe mbetjet urbane, turizmi , bujqësia etj.
Ndërkohë që, çdo investitor që do të marrë statusin strategjik do të përfitojë lehtësi në drejtim të përgatitjes së dokumentacionit dhe aplikimit, përparësi në ndjekjen e procedurave në administratën shtetërore, konsolidimin e tokës, etj.
Gjithashtu ligji i ri jep të drejtën e përdorimit të tokave publike, brigjeve të detit, liqeneve apo lumenjve për investime strategjike. Për këtë qëllim parashikohet dhe krijimi i Fondit të Pasurive të Paluajtshme për Mbështetjen e Investimeve Strategjike. Risi në projektligj përbën dhe trajtimi i një mekanizmi të shpejtë brenda pushtetit ekzekutiv për zgjidhjen e mosmarrëveshjeve që i lindin një investitori me institucionet shtetërore, duke u përpjekur kësisoj të evitohen kostot e shtuara gjyqësore apo të tjera.
Sektorët strategjikë
Sektori energjetik dhe minerar
Sektori i transportit, i infrastrukturës, i komunikimeve elektronike dhe i mbeturinave urbane
Sektori i turizmit (strukturat turistike)
Sektori i bujqësisë (fermat e mëdha bujqësore) dhe i peshkimit
Sektori i zonës ekonomike
Zonat me prioritet zhvillimi
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.