Ligji i faljes, DPT: Kompensimi që përfitojnë tatimpaguesit me tepricë kreditore në TVSH ose me ndonjë detyrim tjetër

Drejtoria e Përgjithshme Tatimeve ka përcaktuar kushtet se si do të bëhet kompensimi i detyrimeve me gjendjen dhe tepricën kreditore të TVSH në ligjin e faljes.

Tatimpaguesit që kanë tepricë kreditore të TVSH-së ose të një detyrimi tjetër tatimor, përfitojnë nga fshirja e detyrimeve tatimore sipas Ligjit nr. 33/2017 “Për pagesën dhe fshirjen/shuarjen e detyrimeve tatimore, detyrimeve të pagueshme në doganë, si dhe procedurën e heqjes nga qarkullimi të mjeteve të transportit pas fshirjes/shuarjes së detyrimeve tatimore:

Pas kompensimit (zvogëlimit) të tepricës deri në masën e tatimit të papaguar pa përfshirë gjobat dhe kamatëvonesat, si dhe detyrimet tatimore të pa hedhura në sistem që i përkasin periudhave tatimore deri më 31.12.2010.

Në rastet kur, teprica nuk mbulon vlerën e plotë të tatimit të papaguar atëherë duhet të kryhet pagesa për pjesën e mbetur dhe më pas bëhet fshirja e kamatëvonesave dhe e dënimeve administrative.

Rregulli për kompensimin zbatohet automatikisht, pa kontroll, përveç rasteve kur tatimpaguesit janë në proces ankimi administrativ ose gjyqësor. Kjo klauzolë zbatohet kur tatimpaguesi heq dorë nga ankimi administrativ ose nga e drejta e padisë/ankimit/rekursit në çdo fazë dhe shkallë të gjykimit pranë gjykatës kompetente.

Kompensimi i tepricës kreditore të TVSH-së dhe çdo lloj tatimi duhet të përdoret për të përputhur fillimisht detyrimet brenda llojit të vetë të tatimit dhe më pas tek tatimet e tjera.

Kompensimit nuk i nënshtrohen detyrimet për kontributet e sigurimeve shoqërore dhe shëndetësore.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.