Ligji i ri, lehtësi për të huajt – Hapet drita jeshile për lëshimin dhe integrimin e lejes unike, si dhe përdorim të pasurisë së paluajtshme
Ligji aktual për të huajt përmban një seri vështirësish që nisin nga marrja e Vizës, te leja e qëndrimit ajo e punës. Shkak për të cilin Ministria e Punëve të Brendshme ka hartuar dhe hedhur për konsultim publik një projektligj që ka për qëllim përmirësimin dhe lehtësimin e kritereve për marrjen e miratimit për punësim dhe procedurave të pajisjes me vizë.
Hendeku kryesor i identifikuar në ligjin aktual për të huajt është fakti se nuk parashikon lëshimin e një “leje të vetme”, në përputhje me Direktivën 2011/98/BE e Parlamentit Evropian dhe e Këshillit, të vitit 2011, “Për procedurën e vetme të aplikimit për një leje të vetme për shtetasit e vendeve të treta për të punuar dhe qëndruar në territorin e një shteti anëtar dhe për një grup të përbashkët të drejtash për punëtorët e vendeve të treta që qëndrojnë në mënyrë të ligjshme në një shtet anëtar”. Për këtë qëllim është punuar specifikisht me nenet e projektligjit të cilat rregullojnë pjesën e tregut të punës dhe lëshimin e lejeve të qëndrimit, me qëllim integrimin e lejes unike, si një nga objektivat kryesorë të punës. Kjo leje do te sjellë ndryshime thelbësore duke garantuar një procedurë të vetme aplikimi, për një leje të vetme, për të huajt që synojnë të punojnë dhe qëndrojnë në territorin e Republikës së Shqipërisë (RSH).
Sipas relacionit shoqërues të Ministrisë së Drejtësisë, Projektligji nëpërmjet dispozitave të tij, përcakton mundësinë për tu pajisur me leje qëndrimi edhe për kategoritë e të huajve të cilët kanë hasur vështirësi në të shkuarën për të qëndruar në Republikën e Shqipërisë, si më poshtë vijon:
Leje qëndrimit për personat pa shtetësi, duke garantuar një qëndrim të ligjshëm për këtë kategori;
Leje qëndrimi për pensionistë, leje e cila do të mbulojë një hendek të ligjit aktual për të huajt, duke u siguruar shtetasve të huaj që janë në pension në vendin e tyre, mundësinë për të aplikuar për një leje qëndrimi për pensionistë, pranë autoritetit përgjëgjës për kufirin dhe migracionin në Republikën e Shqipërisë, nëse preferojnë vendin tonë si një destinacion për të jetuar;
Leje qëndrimi për punonjës lëvizës, të cilët janë shtetasit e huaj që punonjnë në vende të ndryshme, jo në një zyrë apo seli të institucionit, dhe puna e tyre kryesisht është puna lëvizëse ku mjet kryesor pune kanë mjetet e teknologjisë së informacionit;
Dhe në fund një zhvillim shumë I rëndësishëm: Leje qëndrimi e përkohshme për përdorim të pasurisë së paluajtshme në pronësi në Republikën e Shqipërisë, procedurat dhe kriteret e së cilës përcaktohen me Vendim të Këshillit të Ministrave
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.