Lindjet e pakta ngadalësojnë shtimin e popullsisë – Gjirokastra, Vlora dhe Korça në tkurrje
Shtimi natyror i popullsisë vijoi trendin rënës edhe në periudhën Prill-Qershor 2017, duke u ulur me 32,6% krahasuar me një vit më parë.
Gjatë këtij tremujori, numri i Shqiptarëve u rrit me vetëm 1563 banorë, me kryeqytetin si kontribuuesin më të madh. Lindjet në qarkun e Tiranës tejkaluan me 936 numrin e vdekjeve, ndërsa qarqet e tjera me shtesën më të lartë janë Durrësi me 216 lindje më shumë se vdekje dhe Dibra me 199.
Nëse vendi vijon të ketë një numër pozitiv të shtesës natyrore, tre qarqe të vendit tregojnë për një pakësim natyror.
Gjirokastra, i cili është qarku që regjistroi edhe numrin më të ulët të lindjeve (vetëm 83) regjistroi 193 vdekje, duke ulur kështu popullsinë me 110 banorë. Në tkurrje janë edhe qarku i Vlorës dhe i Korçës.
Pakësimi natyror erdhi si pasojë e uljes dramatike të numrit të lindjeve, të cilat pavarësisht rënies së numrit të vdekjeve me 7,4%, nuk arriti të përmbysë drejtimin rënës.
Lindjet për këtë tremujor shënuar një rënie me 15,4%, me Gjirokastrën e Vlorën që kanë regjistruar vetëm 1/3 e lindjeve të një viti më parë. Edhe në Tiranë lindjet janë në rënie me 8,8% krahasuar me Prill-Qershor 2016.
Ndërkohë, shtimi i jetëgjatësisë ka sjellur uljen e numrit të vdekjeve në të gjitha qarqet e vendit, me përjashtim të Fierit, ku ka shënuar rritje me 3,8%.
Rënia më e madhe në këtë tregues i takon qarkut të Lezhës, me 25,5%. Përmirësim të ndjeshëm në jetëgjatësi tregon edhe qarku i Dibrës dhe ai i Shkodrës.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.