Lira turke “ndjek” zgjedhjet – E nis javën në rënie pas humbjeve të Erdogan në Ankara e Stamboll
Presidenti turk Recep Tayyip Erdogan humbi kontrollin në Ankara dhe pritet të humbasë gjithashtu Stambollin, pas 25 vitesh në pushtet në të dy qytetet, në zgjedhjet lokale të ditës së Dielë. Lira turke ra ndjeshëm në ditën e parë tregtare të kësaj jave, duke prekur 6.69 kundër dollarit, pasi bordi i zgjedhjeve në vend lajmëroi se partia e opozitës ishte përpara në Stamboll. Indeksi i titujve të kapitalit BIST 100, ra me 1.65% në hapje të tregtisë europiane dhe ka humbur 7% javën e kaluar.
Vitin e kaluar, valuta humbi 30% të vlerës kundër dollarit amerikan. Fitoret e partisë Popullore Republikane (CHP) përbëjnë një goditje ndaj Qeverisë, kryesisht nëse humbet edhe në Stamboll, qytet ku Erdogan nisi karrierën politike si kryebashkiak në vitet 90. Megjithatë, Partia Drejtësi dhe Zhvillim e Erdogan dhe partneri i djathtë në koalicion, Lëvizja Nacionaliste (MHP), siguruan më shumë se 50% të votave kombëtare dhe shumicën e qarqeve të Stambollit.
Votuesit reflektuan pakënaqësitë mbi vështirësitë ekonomike në votimin e ditës së Diel. Norma e Papunësisë qëndron në 13%, niveli më i lartë në një dekadë dhe inflacioni preku 19.7%. Sipas analistëve, investitorët do të presin tashmë reformat që Qeveria do të prezantojë, pas premtimeve të reja të bëra nga Erdogan. Rënia e lirës ka sjellë dobësimin e fuqisë blerëse të konsumatorëve dhe ka shkaktuar vështirësi për bankat turke dhe bizneset që kanë borxh të lartë në dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.