Liria ekonomike, plus 10 – Raporti i 2017, Shqipëria ngjitet në vendin e 32, lë pas Francë e Itali
Shqipëria ka fituar edhe 10 pozicione të tjera në indeksin global të lirisë ekonomike 2017, të publikuar çdo vit nga instituti Fraser. Raporti i fundit, i sapopublikuar e rendit Shqipërinë në vendin e 32-të në botë, ndër 159 ekonomi të ndryshme.
Ngjyra blu tregon se, vendi ynë është mes atyre që regjistrojnë performancën më të mirë dhe kanë një liri thuajse të plotë ekonomike.
Një vit më parë, Shqipëria fitonte plot 20 pozicione në renditjen e përgjithshme. Në këtë renditje, Shqipëria është jo vetëm e para në rajon, por lë prapa edhe ekonomi si Italia, Franca, apo Japonia.
Në raport nënvizohet fakti se, Shqipëria është një ndër 5 shtetet që ka regjistruar rritjen më të madhe që prej vitit 2000, me plot 79 pozicione, si dhe një ndër 10 vendet që kanë pësuar përmirësimin më të madh në krahasim me raportin e vitit të kaluar.
Indeksi merr në shqyrtim disa kategori, si: Madhësia e Qeverisë, Struktura Ligjore ku përfshihet edhe mbrojtja e së drejtës mbi pronën, paratë e pastra, lehtësia e tregtisë ndërkombëtare dhe legjislacioni.
Përmirësimi në renditjen e fundit vjen kryesisht si pasojë e performancës në nën-indikatorin që i referohet madhësisë së qeverisë, ku Shqipëri renditet e 18-ta, ai i parave të pastra, dhe ai i lirisë për të bërë tregti me jashtë.
Performanca më e dobët është ajo e rregullatorëve të tregut, që e rendit Shqipërinë të 120-tën në botë. Edhe nën-indikatori që i referohet sistemit ligjor dhe të drejtës së pronës shënon një performancë negative, së bashku me atë të rregullatorëve. Në nivel global ndërkohë, në vend të parë vijon të jetë Hong-Kongu.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.