Liria ekonomike, sërish përmirësim – Raporti i “Fraser”, Shqipëria ngjitet në vendin e 30-të në botë, ndër 162 shtete

Instituti “Fraser” ka nxjerrë raportin e vitit 2019 për lirinë ekonomikë, që është një prej raporteve më prestigjioze në nivel global në këtë drejtim. Sipas raportit të këtij viti, Shqipëria renditet në vendin e 30-të në botë, ndër 162 ekonomi, duke qenë një prej vendeve me performancën më të mirë në botë në këtë drejtim.

Nga ana tjetër, renditja e këtij viti përkthehet në një përmirësim me 2 pozicione në renditjen globale. Krahasuar me vendet e tjera të rajonit, Shqipëria është pa diskutim e para ndër to. Përllogaritja e indeksit të lirisë ekonomike bëhet mbi bazën e disa nën-indikatorëve të ndryshëm.

Performancën më të mirë Shqipëria e regjistrin në drejtim të qëndrueshmërisë së parasë, duke u renditur në vendin e 14-të në botë, ndërkohë që performancën më të dobët e regjistron në drejtim të sistemit ligjor dhe të drejtave të pronës, që na rendit në vendin e 83-të në botë. Në nivel global ndërkohë, vendi më lirinë më të madhe ekonomike vlerësohet Hong Kongu, ndërkohë që vendet e para të listës, kryesisht mbahen nga shtetet europiane.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.