“Lirimi” nga TVSH-ja për importin e mallrave në Kosovë, Tatimet shpallin listën me bizneset përfituese

Administrata Tatimore e Kosovës, në bazë të Nenit 29, të Ligjit për TVSH Nr. 05/L-037 publikon listën e bizneseve që u është aprovuar kërkesa për lirimin nga TVSH-ja në importin e mallrave për lëndë të parë dhe pajisje të teknologjisë informative.

Lajmi është bërë i ditur nga ministri i Financave në Kosovë, Avdullah Hoti, ndërkohë që në faqen zyrtare të Administratës Tatimore është publikuar edhe lista zyrtare.

“Përmes Udhëzimit Administrativ Nr. 03/2015, Nenit 48 janë përcaktuar kushtet dhe detajet e tjera për mënyrën e realizimit të këtyre të drejtave ligjore. Përmes kërkesës së tatimpaguesit, e cila duhet të shkarkohet në faqen on-line të ATK-së, si dhe dokumenteve tjera të duhura që duhet të bashkëngjiten (të përshkruara në nenin 48 të UA Nr. 03/2015), Komisioni i ATK-së i autorizuar për këto lirime do t’i shqyrtoj këto kërkesa brenda 15 ditëve, nga dita e pranimit të saj. Bazuar në dokumentin e aprovimit për lirim nga TVSH të lëshuar nga ATK, Dogana do të lirojë mallrat nga TVSH-ja me rastin e importimit. Për më shumë detaje mund të klikoni në këtë link” thotë ministri i Financave Hoti.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.