“Lista e PD është ajo e fitores”, Basha: Nuk kërkojmë mandat tjetër, nëse nuk mbajmë premtimet

Kryetari i Partisë Demokratike, Lulzim Basha ka folur për herë të parë pas dorëzimit të listave të kandidatëve për deputetë. Në një bashkëbisedim me gazetarët, Basha tha se lista e PD është ajo e fitores, ndryshimit dhe normalitetit, ndërsa sulmoi listën e mazhorancës.

“Është listë ndryshimi, listë fitoreje, listë për normalitetin. Për t’i dhënë fund ngecjes 8-vjeçare të Shqipërisë. Me përkushtim të vërtetë qytetar, me ndërthurje, sukses profesional dhe dëshirës.
Këto kanë qenë dhe kriteret e procesit transparent. Kanë marrë pjesë mijëra kandidatë, demokratë. Dua t’i falënderoj. Janë tregues i potencialeve që PD disponon. Janë në funksion të ndryshimit që po vjen. 25 prilli do jetë dita e nisjes së ndryshimit.

Natyrisht që nuk do jetë një betejë e lehtë, jo vetëm për faktin se qeveria dhe km në ikje përsëri e ka vënë bastin tek njerëzit pa integritet, tek njerëzit që dhe në kohë pandemie kanë vjedhur bukën e fëmijëve me tendera sekretë, tek ata që duhet të ishin sot para SPAK-ut për vjedhjen e votave, tek ata që kanë vjedhur paratë e rindërtimit, të cilët fshihen pas një fasade të rreme që Edi Rama e ka ngritur duke abuzuar me figura të ndryshme, pas të cilave fshihen këta njerëz, Arben Ahmetajt, Damian Gjiknurët, Olta Xhaçkat dhe vetë kryeproblemi. Pa largimin e Edi Ramës nuk ka ndryshim. Njësoj siç ka ndërtuar gjithçka në jetën e tij dhe lista e tij është një fasadë.”

Gjithashtu Basha u angazhua se nëse qeveria e drejtuar nga Partia Demokratike nuk do të mbajë premtimet, nuk do të kërkojë një mandat të dytë.

“Rama nuk shkel dot nga mendjet e njerëzve keq-menaxhiimin e pandemisë, abuzimin me paratë e tyre. Një grusht njerëzish nuk duan që të vijë ndryshimi. Rama dhe integrimi janë në konflikt me njëri-tjetrin. Integrim do të thotë normalitet dhe jo hajdut e kriminel në parlament e në qeveri. Më 25 prill ekipi fitues do presë nyjën gordiane, duke larguar Edi Ramën.

Damian Gjiknuri e Olta Xhaçka me shokë janë në listë. Asgjë nuk ndryshon gjithsesi pa larguar Ramën. Ne kemi program për ndryshimin e pritshëm. Ekipi ynë do jetë fitues më 25 prill. Nëse nuk mbajmë premtimet tona, unë nuk kërkoj mandat të dytë. Ne do u kthejmë institucionet qytetarëve”, tha Basha.

Kreu i opozitës vlerësoi se data 25 prill do të jetë dita e ndryshimit të madh popullor.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.