Listimi i OSHEE në bursë – Privatizohet kompania furnizuese, një pjesë e aksioneve për publikun
Furnizuesi i Tregut të Lirë, që është një prej 3 kompanive të krijuara nga ndarja e Operatorit të Shpërndarjes së Energjisë Elektrike do të privatizohet brenda shtatorit të vitit që vjen, ndërkohë që një pjesë e aksioneve të saj do të listohen në bursë, për t’u blerë nga publiku shqiptar”.
Gjithçka përcaktohet në Planin Strategjik për Reformimin e Sektorit të Energjisë, që është dokumenti më i rëndësishëm për ndryshimet e sektorit në 2 vitet e ardhshme.
Referuar dokumentit, pjesa më e madhe e aksioneve të kompanisë furnizuese do të privatizohet nga një investitor strategjik, çka do të lehtësonte zbatimin e transformimit në një kompani biznesi private dhe konkurruese.
Ndërkohë që një pjesë e aksioneve do të jenë në dispozicion të publikut shqiptar. Listimi në Bursë i një pjese aksionesh është paralajmëruar më herët nga kryeministri Edi Rama, por në atë kohë nuk u dhanë detaje se cila prej kompanive të krijuara nga ndarja e OSHEE-së do t’i nënshtrohej procedurave të privatizimit.
Aktualisht ka përfunduar ndarja ligjore e kompanisë, ndërkohë që deri në muajin shtator të vitit që vjen duhet të jetë përmbyllur edhe ndarja e aseteve, shpërndarja e pagesave të prapambetura si dhe borxhet mes kompanive.
Kompania e parë e krijuar nga ndarja ligjore është Operatori i Sistemit të Shpërndarjes, që do të ketë objekt të punës shpërndarjen e energjisë, duke përfshirë ndërtimin dhe mirëmbajtjen e rrjetit.
Kompania e dytë është Furnizuesi i Tregut të Lirë dhe do të merret me blerjen dhe menaxhimin e energjisë në tregun e lirë.
Ndërkohë që, kompania e tretë është Furnizuesi i Shërbimit Universal dhe do të ketë në fokus furnizimin me energji të klientëve fundorë që veprojnë në tregun e rregulluar.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.