Llalla në kërkim ndërkombëtar? – Zbulohet dita e daljes nga Shqipëria, Policia mund të mos presë 3 muaj për ish Kryeprokurorin
Ndërsa nuk duhet vendndodhja e saktë jashtë Shqipërisë, autoritetet shqiptare mund të shpallin menjëherë në kërkim ndërkombëtar Adriatik Llallën, pasi ka tashmë datën e saktë kur është larguar nga vendi. Kjo pasi ligji parashikon shpalljen në kërkim kombëtar menjëherë pas vendimit të formës së prerë të gjykatës, që do të thotë se do duhet që për 3 muaj Llalla të kërkohet në vend, por fakti që TIMS tregon largimin e tij nga Shqipëria në 9 shtator, pritet që policia të t’i japë zgjidhje situatës, nëse do e zbatojë këtë kohë, apo do e shpallë menjëherë në kërkim ndërkombëtar.
Apeli i Gjykatës së Posaçmë kundër Krimit e Korrupsionit ka lënë në fuqi të mërkurën vendimin e shkallës së parë që e dënoi me dy vite burg dhe sekuestrim të pasurive ish Prokurorin e Përgjithshëm Adriatik Llalla. Vendimi është marrë në mungesë të Llallës, I cili është përfaqësuar nga avokati Sokol Hazizaj, me justifikimin se ish Kryeprokurori gjendet jashtë shtetit për shkak të një sëmundjeje të rëndë.
Gjykata e posaçme vendosi njëherësh edhe sekuestrimin e 5 pasurive të paluajtshme në zotërim të tij. Bëhet fjalë për katër sipërfaqe tokë arë, në zona mjaft të shtrenjta në afërsi të Tiranës, si dhe një apartamenti në Durrës.
Llalla u çua në gjykatë nga SPAK, nën akzuat “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tre herë, të parashikuar nga neni 257/a, paragrafi (2) i Kodit Penal.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.