Llogaridhënia në qarkun e Elbasanit, Balla e Ahmetaj: Nga denoncimet e qytetarëve janë larguar mbi 150 zyrtarë
Kryetari i Grupit Parlamentar të PS, Taulant Balla gjatë llogaridhënies së qeverisë në qarkun e Elbasanit ka nxitur të gjithë qytetarët të denoncojnë çdolloj padrejtësie që hasin në zyrat e administratës shtetërore. Deri më tani Balla deklaroi se janë shkarkuar mbi 150 zyrtarë nga denoncimet e qytetarëve
“Dua t’ju nxis të gjithëve që mos të hezitoni në asnjë rast, nëse një zyrtar në një zyrë të caktuar të shtetit ju nxin jetën, mos kini asnjë merak, vetëm denoncojini. Vetëm për shkak të denoncimeve të qytetarëve të zakonshëm të këtij vendi janë mbi 150 zyrtarë, të cilët jo vetëm janë larguar, por sot ndiqen penalisht. “Shqipëriaqëduam.al” nuk e kemi për fasadë, ne besojmë tek bashkëqeverisja me ju”.
Më pas Balla së bashku më Ministrin e Financave dhe Ekonomisë, Arben Ahmetaj dhe disa zëvendësministra dhe drejtues qendrorë institucionesh u ndalën edhe në qytetin e Përrenjasit ku iu përgjigjën shqetësimeve dhe ankesave të banorëve.
Një qytetar u ankua se i ka dërguar një ankesë me shkrim Drejtorit të Përgjithshëm të ISSH-së, Astrit Hado, por nuk ka marrë përgjigje.
“Drejtori shkarkohet nëse ka shkelur afatin në kthimin e përgjigjes”, deklaruan Balla dhe Ahmetaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.